VIDEO / રાજ્યમાં દારૂબંધી માત્ર 'કાગળ' પર, કચ્છના ગામડામાં દારૂની બોટલ સાથેના નાચનો વીડિયો વાયરલ

• લગ્ન પ્રસંગે દારૂની રેલમછેલનો વીડિયો થયો વાયરલ
• મુંદ્રાના કાંડાગરા ગામનો લગ્ન પ્રસંગનો વીડિયો વાયરલ
• લગ્ન પ્રસંગે લોકો પર દારૂના ફુવારા છોડાયા 

આ વીડિયો કચ્છના મુન્દ્રાનો હોવાનું સામે આવ્યું છે. મુંદ્રા તાલુકાના કાંડાગરા ગામમાં એક પરિવારને ત્યાં લગ્ન પ્રસંગ હતો, જેમાં રાસગરબાની રાત્રે કેટલાક યુવાનો હાથમાં દારૂની બોટલ સાથે ગરબે ઝુમી રહ્યા છે. આ વીડિયો સોશિયલ મીડિયામાં વાયરલ થતા હાહાકાર મચી ગયો છે. 

લગ્ન પ્રસંગમાં ખુલ્લેઆમ દારૂની પાર્ટી

રાજ્યમાં દારૂબંધી હોવા છતા, આ રીતે લગ્ન પ્રસંગમાં ખુલ્લેઆમ દારૂની પાર્ટી થઈ રહી હોવાનો વીડિયો સોશિયલ મીડિયામાં વાયરલ થતા દારૂબંધીની પોલ ખુલી ગઈ છે, જેને પગલે પોલીસ પણ દોડતી થઈ ગઈ છે અને દારૂની મહેફિલમાં તપાસના આદેશ અપાયા છે. આઈ.જી સુભાષ ત્રિવેદીએ તપાસના આદેશ આપી દીધા છે. મહેફિલ માણતા તમામ સામે ગુનો દાખલ કરાશે.

વારંવાર બની રહી છે આવી ઘટના 

ઉલ્લેખનીય છે કે, ગાંધીના ગુજરાતમાં દારૂ પર કડક પ્રતિબંધ લાદવામાં આવ્યો છે પરંતુ આ પ્રતિબંધ માત્ર કાગળ પર રહ્યો હોય તેમ લાગી રહ્યું છે. કારણ કે, દારૂબંધી હોવા છતાં રાજ્યમાંથી છાશવારે મોટા પ્રમાણમાં દારૂનો જથ્થો ઝડપાય છે તો વળી ક્યારેક દારૂની પાર્ટીના વીડિયો પણ વાયરલ થઇ રહ્યા છે. ત્યારે આ મામલે સરકાર દ્વારા તાત્કાલિક અસરથી નિયમોને વધુ કડક બનાવવામાં આવે તે ખરેખર જરૂરી છે. 

સળગતા સવાલ 
દારૂની મહેફિલ કરનારા સામે કડક કાર્યવાહી થશે?
શું પોલીસ આ વીડિયો જોયા બાદ પગલા ભરશે?
શું આ  છે  કચ્છની સંસ્કૃતિ?
દાંડિયારાસના કાર્યક્રમમાં દારૂની રેલમછેલ કરનારા કોણ?
મુંદ્રાના કાંડાગરા ગામમાં દારૂબંધીના ધજાગરા કેમ?
દારૂના નશામાં ભાન ભૂલેલાને કોણ પાઠ શીખવશે?
શું આ લોકો કોઇ રાજકીય વગ ધરાવે છે?
શું આ છે કચ્છની સંસ્કૃતિ?