દૂધસાગર ડેરી / સાગરદાણ કૌભાંડ મામલે પૂર્વ ચેરમેન વિપુલ ચૌધરીને ટ્રિબ્યુનલ તરફથી મોટો ઝટકો

વિપુલ ચોધરીને 30 સપ્ટેમ્બર સુધીમાં મહેસાણા જિલ્લા સહકારી દૂધ ઉત્પાદક સંઘમાં 9 કરોડ રૂપિયા જમા કરાવવા હુકમ કરવામાં આવ્યો છે. આપને જણાવી દઈએ કે, રૂપિયા 22.50 કરોડની રિકવરી મુદ્દે વિપુલ ચૌધરીએ ટ્રિબ્યુનલમાં અરજી કરી હતી. ત્યારે ટ્રિબન્યુનલે વિપુલ ચૌધરીને ઝટકો આપ્યો છે.

22.50 કરોડનો ચારો આપીને વિશ્વાસઘાત કર્યો

મહેસાણાની દૂધસાગર ડેરીના પૂર્વ ચેરમેન વિપુલ ચૌધરીને ગેરરીતિના કેસમાં ડેરીના ચેરમેન પદેથી હટાવવા હાઇકોર્ટના આદેશ બાદ તેની ધરપકડ કરાઇ હતી. તેઓ જ્યારે ડેરીના ચેરમેન હતા તે દરમિયાન ડેરીના ફંડમાંથી સભ્યોની મંજૂરી વિના જ મધ્યપ્રદેશને 22.50 કરોડનો ચારો આપીને વિશ્વાસઘાત કર્યો હતો. કરોડો રૂપિયાના સાગરદાળ કૌભાંડ સાબિત થતાં તેમને ચેરમેન પદેથી છ વર્ષ માટે ગેરલાયક ઠેરવવામાં આવ્યા હતા. વિપુલ ચૌધરી વિરૂદ્ધ રજીસ્ટ્રારથી લઇને સુપ્રીમકોર્ટ સુધી પીટીશન દાખલ થઇ હતી, અને તેમનું કૌભાંડ સાબિત થતા તેમની ધરપકડ થઇ હતી. જોકે વિપુલ ચૌધરીએ સાગર દાણ કૌભાંડ મામલે હાઈકોર્ટમાંથી આગોતરા જામીન મેળવ્યા હતા.

વિપુલ ચૌધરીએ કોર્ટ સાથે ઠગાઈ કરી કર્યો હતો વિદેશ પ્રવાસ

સાગર દાણ કૌભાંડ કેસની તપાસમાં ખુલાસો થયો હતો. જેમાં આરોપી વિપુલ ચૌધરીએ કોર્ટ સાથે ઠગાઈ કરીને વિદેશ પ્રવાસ કર્યો હતો. વિપુલ ચૌધરીનો પાસપોર્ટ 2018થી કોર્ટ કસ્ટડીમાં છે. તેણે કેન્સલ થયેલો પાસપોર્ટ કોર્ટમાં જમા કરાવ્યો હતો. રીન્યુ કરાવેલા પાસપોર્ટના આધારે તેણે વિદેશ પ્રવાસ કર્યો હતો. એપ્રિલ 2018થી ઓગસ્ટ 2018 દરમિયાન વિપુલ ચૌધરીએ આ પ્રવાસ કર્યો હતો. બી-ડિવિઝનના PI મોડિયાએ હાઇકોર્ટમાં કરેલા સોગંદનામાં આ હકીકત સામે આવી હતી. આ સોગંદનામાના પેરેગ્રાફ નંબર 13માં તેમણે આ હકીકતનો ઉલ્લેખ કર્યો હતો. પાસપોર્ટ કોર્ટમાં સરન્ડર હોવા છતાં તેણે વિદેશ પ્રવાસ કર્યો હતો. સોગંદનામું મહેસાણા ચીફ કોર્ટમાં રજૂ કરવામાં આવ્યું હતું. ત્યારે વિપુલ ચૌધરીએ જામીનની શરતોનો ભંગ કરતા સરકાર જામીન રદ કરવા હાઇકોર્ટમાં અરજી કરશે.