રવિવારનો દિવસ ઘાતક સાબિત થયો છે. અમદાવાદના કાંકરિયામાં આવેલ બાલવાટિકામાં ડિસ્કવરી નામની રાઇડ તૂટતા 3 લોકોનાં મોત થયા છે. જ્યારે 15 લોકો ઇજાગ્રસ્ત થયા છે. સમગ્ર દુર્ઘટનાનો વીડિયો સામે આવ્યો છે.
અમદાવાદ જેના નામથી પ્રખ્યાત છે તે કાંકરિયામાં ગંભીર દુઘટના બની હતી. અહીં આવેલ બાલવાટિકામાં ડિસ્કવરી નામની રાઇડ વધારે વજનના કારણે તૂટી હતી. જેમાં ઘટના સ્થળે બે લોકોના મોત નિપજ્યાં હતા, જ્યારે એકનું સારવાર દરમિયાન મોત નિપજ્યું છે. તો 15થી વધુ લોકો ઇજાગ્રસ્ત થયા છે.
રવિવાર અને ગૌરીવ્રત હોવાથી કાંકરિયામાં લોકોની ભીડ જામી હતી. તો રાઈડમાં પણ મોટી સંખ્યામાં લોકો બેઠા હતા. 32 લોકોની સંખ્યાવાળી આ ડિસ્કવરી રાઈડમાં 31 લોકો બેઠા હતા. ત્યારે તે 60 ફૂટથી ઉંચે જતી વેળાએ રાઈડ તૂટી પડી હતી જેને લઇને આ દુર્ઘટના સર્જાઇ હતી. જેનો વીડિયો સામે આવ્યો છે.
જોકે, તંત્રએ તાબડતોબ ઘટનાસ્થળે પહોંચીને ફસાયેલા લોકોને બહાર કાઢીને એલજી હોસ્પિટલમાં સારવાર માટે ખસેડ્યા હતા. હાલ સમગ્ર ઘટનાને લઈને મુખ્યમંત્રી રૂપાણીએ તપાસના આદેશ આપ્યા છે.
ફાયર વિભાગના અધિકારીના જણાવ્યા અનુસાર, જમીનથી આ રાઈડની હાઇટ 60 ફૂટની છે. પાઇપનો વચ્ચેનો ભાગ તૂટતા આ દુર્ઘટના બની છે. જેને લઇને લોકો નીચે પડકાયા હતા. 32ની રાઇડ છે તેમાં 31 લોકો બેઠા હતા. જેમાં નાના બાળકો અને મહિલાઓને વધુ ઇજા પહોંચી છે.