વડોદરાના કરજણ ટોલનાકા પાસે કારમાં આગ લાગવાની ઘટના સામે આવી છે. કરજણ નેશનલ હાઈને નંબર 48 પર એકાએક કારમાં આગ લાગતા અફરા-તફરીનો માહોલ સર્જાયો હતો. આગે વિકરાળ સ્વરૂપ ધારણ કરતા કાર બળીને ખાખ થઈ હતી.
જો કે સદનસીબે આ ઘટનામાં કોઈ જાનહાનિ થઈ ન હતી. કારમાં સવાર 4 મુસાફરોનો આબાદ બચાવ થયો હતો. આ ઘટનાની જાણ થતાં ફાયર વિભાગના અધિકારીઓ ઘટના સ્થળે દોડી આવ્યા હતા અને ભારે જહેમત બાદ આગ પર કાબૂ મેળવ્યો હતો.
આ ઘટના અંગે મળતી વિગત અનુસાર વડોદરા શહેરના કરજણ ટોલનાકા પાસે એક ગાડીમાં અચાનક આગ ભભૂકી ઉઠી હતી. આજરોજ વહેલી સવારે એક CNG એસ્ટીમ કાર ટોલગેટ ક્રોસ કરીને કરજણ તરફ જઇ રહી હતી ત્યારે અચાનક ગાડીમાં આગ લાગતા કારમાં સવાર લોકો હતપ્રત થઇને કારમાંથી નીચે ઉતરી ગયા હતા.
જ્યારે આ કાર જોતજોતામાં અગનગોળો બની હતી. આ બનાવ બનતા આસપાસના લોકો ઘટના સ્થળે આવી પહોંચ્યા હતા અને નજીકના ફાયર સ્ટેશનને જાણકારી આપી હતી.
ટોલનાકા નજીક રહેલા ફાયર સ્ટેશનને જાણ થતા ફાયર ફાયટર તાત્કાલિક અસરથી ઘટના સ્થળે આવી પહોંચ્યા હતા અને સળગતી કાર પર પાણીનો સતત મારો ચલાવ્યો હતો. જો કે આ ઘટનાને પગલે હાઇવે પર ટ્રાફિક જામ થઇ ગયો હતો. જો કે આ ઘટનામાં સદનસીબે કોઇ જાનહાનિ થઇ ન હતી. આ સાથે કારમાં આગ અચાનક કેમ લાગી તે અંગે કોઇ ચોક્કસ કારણ સામે આવ્યું નહોતું.