પર્દાફાશ / રેમડેસિવિરની અછત વચ્ચે વડોદરામાંથી ઝડપાયું મોટું કૌભાંડ, જાણો કેટલા ઇન્જેક્શન ઝડપાયા

• ગેરકાયદે રેમડેસિવિર ઈન્જેકશન વેચતી ગેંગ ઝડપાઈ
• 90 ઈન્જેકશનના જથ્થા સાથે 4ની ધરપકડ
• 16 હજારથી 25 હજારમાં વેંચતા હતા ઈન્જેકશન

મળતી જાણકારી પ્રમાણે, થોડા સમય પહેલા અમદાવાદના કેમિસ્ટનું રેમડેસિવિર કૌભાંડ ઝડપાયા બાદ રેમડેસિવિરની કાળાબજારીનું રાજ્યનું અત્યારસુધીનું સૌથી મોટું કૌભાંડ વડોદરા ક્રાઇમ બ્રાન્ચે ખુલ્લું પાડ્યું છે. 

90 ઇન્જેક્શન સાથે ઝડપાયા શખ્સો 

વડોદરા ક્રાઇમ બ્રાન્ચે કાળાબજારી કરનારા ચાર શખ્સો પાસેથી 90 ઇન્જેક્શન ઝડપી પાડયા છે. રેમડેસિવિર ઈન્જેકશનના જથ્થા સાથે 4ની ધરપકડ કરવામાં આવી હતી. આ ગેંગ અત્યાર સુધીમાં 350 રેમડેસિવિર ઈન્જેકશન વેચી ચૂકી છે. આ ગેંગમાંથી 3 વડોદરાના અને 1 આણંદના શખ્સની ધરપકડ કરવામાં આવી છે. 

કાળબજારીનું કૌભાંડ 

વડોદરા શહેર પોલીસ કમિશનર શમશેરસિંઘે આ મામલે નિવેદન આપ્યું હતું કે, વડોદરા ક્રાઇમ બ્રાંચે રેમડેસિવિર ઇન્જેક્શનની કાળાબજારીના કૌભાંડનો પર્દાફાશ કર્યો છે. કાળાબજારીમાં ફાર્માસિસ્ટ, મેડિકલ સ્ટોર અને મેડિકલ સપ્લાય એજન્સી સંડોવાયેલી છે. જેમાં વિકાસ પટેલ શ્રોફ હોસ્પિટલના મેડિકલ સ્ટોરમાં નોકરી કરે છે અને આ વિકાસ પટેલ આણંદના જતીન પટેલ પાસેથી ઇન્જેક્શન લાવતો હોવાનું સામે આવ્યું છે. તો જતીન પટેલ નામનો આ શખ્સ મેડિકલ એજન્સી ચલાવતો હોવાનો ખુલાસો થયો છે.