લોકસભા ચૂંટણીનુ આવતી કાલે ગુરૂવારે પરિણામ જાહેર થશે. દેશની તમામ બેઠકો પર આવતી કાલે મતગણતરી યોજાવાની છે. જેમાં ગુજરાતની 26 બેઠકો પર મતગણતરી થશે. જ્યારે વડોદરા શહેરમાં પોલિટેકનીક કોલેજમાં મતગણતરી હાથ ધરાશે.
વડોદરામાં એક સાથે 98 EVM મશીનનું કાઉન્ટીંગ થશે. પોલીસના ચુસ્ત બંદોબસ્ત વચ્ચે મતગણતરી હાથ ધરાશે. મતગણતરીના દિવસે 550 જવાનો સવારે 4 વાગ્યાથી બંદોબસ્તમાં જોડાઇ જશે. આ સાથે જ 700 જેટલા કર્મચારીઓનો સ્ટાફ પણ મતગણતરીમાં જોડાશે.
જ્યારે ચૂંટણીપંચ દ્વારા મતગણતરી કેન્દ્ર પર મોબાઈલ લઈ જવા પર પ્રતિબંધ લગાવવામાં આવ્યો છે અને ગેંડા સર્કલથી ફતેગંજ સુધી વાહનચાલકો માટે રસ્તો બંધ કરવામાં આવ્યો છે. આવતીકાલે દેશભરમાં લોકસભા ચૂંટણીની મતગણતરી હાથ ધરવામાં આવશે. ગુજરાતમાં પેટા ચૂંટણી સહિત લોકસભાની મતગણતરી 28 કેન્દ્ર પર હાથ ધરવામાં આવશે.
જેની જવાબદારી 26 RO, 180 ARO અને 103 મદદનીશ ચૂંટણી અધિકારીને સોંપવામાં આવી છે. જ્યારે 122 વધારાના મદદનીશ ચૂંટણી અધિકારીઓ ફરજ પર રહશે. જ્યારે 41 ઓબ્ઝર્વરો, 2548 કાઉન્ટિંગ સુપરવાઈઝર અને 2548 કાઉન્ટિંગ આસિસ્ટન્ટ તેમજ 2912 માઈક્રો ઓબ્ઝર્વરની નિમણૂક કરવામાં આવી છે. જ્યારે વિધાનસભા બેઠક દીઠ ડ્રો સિસ્ટમથી 5 VVPATની મતગણતરી કરવામાં આવશે.