વડોદરા કોર્પોરેશને વિદ્યાર્થીનીઓ માટે શાળામાં કર્યુ શાનદાર કામ જાણીને કહેશો વાહ!

વડોદરા કોર્પોરેશન દ્વારા સ્વચ્છ ભારત મિશન અંતર્ગત રાજયમાં પ્રથમવાર શાળાની વિધાર્થીનીઓને સેનેટરી નેપકીન શાળામાં જ મળી રહે તે હેતુથી શાળાઓમાં સેનેટરી નેપકીન વેન્ડીંગ મશીનનું લોકાર્પણ કરવામાં આવ્યું છે. 

કેવી રીતે સેનેટરી નેપકીન વેન્ડીંગ મશીનનો વિધાર્થીનીઓ કરી શકશે ઉપયોગ?
શાળામાં અભ્યાસ કરવા આવતી વિધાર્થીનીઓને માસિક સમય દરમિયાન અનેક મુશ્કેલીઓ થતી હોય છે. જેને ધ્યાનમાં રાખી કોર્પોરેશન તંત્રએ વાત્સલ્ય સંસ્થા સાથે મળી સીએસઆર અંતર્ગત 100થી વધુ સરકારી અને ખાનગી શાળાઓમાં સેનેટરી નેપકીન વેન્ડીંગ મશીન મુકાવ્યા છે. સુરસાગર તળાવ પાસે આવેલી સરકારી બુનિયાદી સ્ત્રી અધ્યાયન મંદિર શાળામાં પીટીસીનો અભ્યાસ કરવા આવતી વિધાર્થીનીઓ માટે મેયર મ્યુનિસિપલ કમિશ્નર સહિત કોર્પોરેશનના હોદ્દેદારોએ વેન્ડીંગ મશીનનું લોકાર્પણ કર્યું. મેયર અને મ્યુનિસિપલ કમિશ્નરે કહ્યું કે વિધાર્થીનીઓને મફતમાં સેનેટરી નેપકીન જરૂરિયાતના સમયે મળી રહે તે માટે સેનેટરી નેપકીન વેન્ડીંગ મશીન મુકવામાં આવ્યા છે.

કોર્પોરેશન અને વાતસલ્ય સંસ્થા સંયુકત રીતે મળી વિધાર્થીનીઓને માત્ર સેનેટરી નેપકીન મળી રહે તે જ નહી પરંતુ નેપકીનનો સાયન્ટીફીક રીતે ડિસ્પોઝલ કઈ રીતે કરી શકાય તેની પણ સમજ વિધાર્થીનીઓને આપવામાં આવી રહી છે. સાથે જ વિધાર્થીનીઓને વેન્ડીંગ મશીનમાંથી કેવી રીતે સેનેટરી નેપકીન કાઢવા તે પણ સમજાવવામાં આવી રહ્યું છે. વિધાર્થીનીઓએ કોર્પોરેશનની પહેલની આવકારી ખૂબ જ ફાયદારૂપ સાબીત થશે તેમ કહ્યું.

મહત્વની વાત છે કે વડોદરા કોર્પોરેશનની આ નવતર પહેલથી અનેક ગરીબ પરિવારની દીકરીઓ રોગની ઝપેટમાં આવતા બચી જશે. ત્યારે વિધાર્થીનીઓને મફતમાં સેનેટરી નેપકીન શાળામાં જ પુરા પાડવાનું પાલિકાનું અભિયાન ખરા અર્થમાં સ્વચ્છતા અભિયાન સાબીત થશે.