કઠણાઇ / ગુજરાત માથે સંકટના વાદળ, આ તારીખે ફરી પડશે વરસાદ, જાણો તમારા વિસ્તારની આગાહી

• ગુજરાત પર હજુ સંકટના વાદળ 
• 30 થી 3 તારીખ સુધી કમોસમી વરસાદની આગાહી 
• ત્રણે ઋતુઓ એક સાથે જોવા મળશે 

ગુજરાતમાં હજુ પણ સંકટના વાદળ ટળ્યા નથી.રાજ્યમાં હજુ પણ કમોસમી વરસાદ પડી શકે છે. એક તરફ તમિલનાડુમાં ભારે વરસાદના કારણે તબાહી મચી છે તો બીજી તરફ દેશના અન્ય વિસ્તારોમાં પણ કમોસમી વરસાદની આગાહીએ ખેડૂતોની ચિંતામાં ભારે વધારો કર્યો છે. 

એક્ તરફ શિયાળો બીજી તરફ વરસાદ 

શિયાળાની શરૂઆત થઈ ગઈ છે. કડકડતી ઠંડી પણ પડી રહી છે. બપોરના સમયે સુર્ય પૂરો હોવાના કારણે ગરમી જેવો માહોલ પણ થઈ જાય છે અને તેવામાં હવે વરસાદ પણ વિલન બનીને આવી રહ્યો છે. જે ખેડૂતોની ચિંતા પણ વધારી શકે છે. ત્રણે ઋતુઓ એક સાથે અનુભવાતી હોવાથી સ્વાસ્થ્ય સંબંધિત સમસ્યાઓ પણ જોવા મળી શકે છે પણ સૌથી વધારે ચિંતા જો કોઈને હોય તો એ છે જગતનો તાત એટલે કે ખેડૂતને. 

આ સમય દરમિયાન પડશે વરસાદ 

હવામાન વિભાગના મતે 30 નવેમ્બરથી 3 ડિસેમ્બર સુધી કમોસમી વરસાદ થઈ શકે છે. વેસ્ટર્ન ડિસ્ટર્બન્સના કારણે આ સ્થિતિ સર્જાશે. જેમાં 30 નવેમ્બરે દીવ, જૂનાગઢ, પોરબંદર, અમરેલી, દ્વારકા, દાહોદ, ગોધરા, પંચમહાલ, અમદાવાદ, આણંદ અને ખેડામાં છૂટા છવાયા ઝાપટા પડી શકે છે. જ્યારે 1 ડિસેમ્બરે આણંદ, ભરૂચ, નવસારી, વલસાડ, ભાવનગર, ડાંગ, છોટાઉદેપુર, સુરત, બોટાદ અને દીવમાં પણ કમોસમી વરસાદ વરસી શકે છે. 2 ડિસેમ્બરે ઉત્તર ગુજરાતના સાબરકાંઠા, અરવલ્લી, મોડાસા, જ્યારે મધ્ય અને દક્ષિણ ગુજરાતના મહીસાગર, ડાંગ અને તાપીમાં ઝાપટા પડી શકે છે.. આ ઉપરાંત 3 ડિસેમ્બરે સુરત, ડાંગ, તાપી, દીવ અને વલસાડમાં કમોસમી વરસાદ વરસવાની શક્યતા છે.

આ માવઠાઓનું કારણ વેસ્ટર્ન ડિસ્ટર્બન્સ માનવામાં આવે છે. પણ જો હવે વરસાદ પડશે તો રવિ પાકને પણ મોટું નુકસાન જશે તે નિશ્ચિત છે. કુદરતના કહેરની સજા હંમેશા ખેડૂતોને જ સૌથી વધારે ભોગવવી પડે છે એવું લાગી રહ્યું છે.