Happy B'day / અશક્યને શક્ય કરવા માટે જાણીતા રજનીકાંતનો આજે જન્મદિવસ, એશિયામાં સૌથી વધુ ફી લે છે અભિનેતા

• રજનીકાંતનો 70મો જન્મદિવસ 
• એશિયામાં લે છે સૌથી વધુ ફી 
• થલાઇવાના નામથી જાણીતા રજનીકાંત 

ગરીબીમાં નાનપણ
રજનીકાંતને સાઉથમાં થલાઇવા તરીકે ઓળખવામાં આવે છે અને કેટલાક અલગ અલગ નામથી તેમને લોકો સંબોધે છે. હાલ તે જેટલા અમીર છે તેટલા જ નાનપણમાં તે ગરીબ હતા. રજનીકાંત તેમના 4 ભાઇબહેનોમાં સૌથી નાના છે અને તેમની માતા રમાબાઇનું નિધન ત્યારે થયુ જ્યારે રજની માત્ર 4 વર્ષના હતા. પિતા પોલીસમાં કોન્સ્ટેબલ હતા અને ઘરની આવી હાલત જોઇને તેમણે નાની ઉંમરમાં કમાવાનું શરૂ કરી દીધું હતું. નાનપણમાં રજનીએ કંડક્ટરથી લઇને કુલી સુધીનું કામ કર્યું. 

ફિલ્મી કરિયર 
રજનીને ફિલ્મોમાં પહેલેથી જ રસ હતો. કંડક્ટરની નોકરી કરતા હતા ત્યારે જ તેમણે કન્નડ રંગમંચમાં કામ કરવાનું શરૂ કરી દીધુ હતુ. જે બાદ 1973માં તે મદ્રાસ ફિલ્મ ઇન્સ્ટીટ્યુટ સાથે જોડાઇ ગયા હતા અને 25 વર્ષની નાની ઉંમરમાં તેમણે ફિલ્મોમાં કામ કરવાનું શરૂ કર્યુ હતુ. તેમના પહેલી તામિળ ફિલ્મ અપૂર્વા રાગનગાલ હતી. જેમાં તેમની સાથે કમલ હાસન અને શ્રીવિદ્યા હતા. 

રજનીને લીડ રોલમાં 1978માં તામિળ ફિલ્મ ભૈરવી મળી હતી. તે ફિલ્મ સુપરહિટ રહી અને બાદમાં રજનીની સુપરહિટ ફિલ્મોની ગાડી ક્યારેય અટકી જ નહી. તેમનું અસલી નામ શિવાજી રાવ ગાયકવાડ છે પરંતુ ફિલ્મોમાં આવ્યા બાદ તેમણે પોતાનું નામ બદલી નાંખ્યું. 

હિન્દી ફિલ્મ કરિયર 
રજનીકાંતે એક બાદ એક ફિલ્મ કરી અને બાદમાં અંધા કાનૂનથી હિન્દી ફિલ્મોમાં ડેબ્યુ કર્યું. બોલિવૂડમાં પણ લોકો તેમના અલગ અંદાજ અને સ્ટાઇલના દિવાના થઇ ગયા હતા. તેમની સિગરેટને ફ્લિપ કરવાવાળી સ્ટાઇલની કોપી આજે પણ લોકો કરે છે. તેમણે પોતાના કરિયરમાં 2.0, ઇન્સાફ કોન કરેગા, ક્રાંતિકારી, મેરી અદાલત, જોન જ્હોની જનાર્દન, ભગવાન દાદા, અંધા કાનૂન, ચાલાજ અને ઇન્સાનિયત જેવી ફિલ્મોમાં કામ કર્યુ છે. 

એશિયામાં સૌથી વધુ ફી ચાર્જ કરનાર એક્ટરમાં સામેલ 
રજનીકાંતની ફી વિશે જો વાત કરીએ તો એશિયામાં સૌથી વધારે ફી લેનારા એક્ટર્સમાં તે સામેલ છે. સૂત્રોનું માનીએ તો તે એક ફિલ્મના 80 કરોડથી વધારે ચાર્જ કરે છે. 

બેયર ગ્રિલ્સે રજનીની સ્ટાઇલ કરી કોપી 
રજનીકાંતે જ્યારે મેન વર્સેઝ વાઇલ્ડની શૂટિંગ કરી ત્યારે બેયર ગ્રિલ્સને પણ પોતાની ચશ્મા પહેરવાની સ્ટાઇલ શીખવાડી હતી અને તેને લોકોએ ખુબ પસંદ કરી હતી. રજનીની છેલ્લી ફિલ્મ દરબાર હતી જે લોકોએ ખૂબ પસંદ કરી હતી.