જામનગરના મીઠાઈ ગામના પાટિયા નજીક ત્રણ કાર વચ્ચે ગંભીર અકસ્માત સર્જાતા રાવલ નગરપાલિકામાં ફરજ બજાવતા બે કર્મચારીઓના મોત.
જામનગરના ખંભાળિયા ધોરીમાર્ગ પર ત્રણ કાર વચ્ચે અકસ્માત
અકસ્માતમાં રાવલ ન.પા.માં ફરજ બજાવતા બે કર્મચારીઓના મોત
અન્ય છ વ્યક્તિઓને ઇજા પહોંચતા જામનગર ખસેડાયા
જામનગરના ખંભાળિયા ધોરીમાર્ગ પર ગમખ્વાર અકસ્માત સર્જાયો છે. મીઠાઈ ગામના પાટિયા નજીક ત્રણ કાર વચ્ચે ગંભીર અકસ્માત સર્જાતા બે યુવાનોના મોત નિપજ્યાં છે. દેવભૂમિ દ્વારકા જિલ્લાના રાવલ ગામના બે યુવાનોના મોત થયા છે. રાવલ નગરપાલિકામાં ફરજ બજાવતા બે કર્મચારીઓના મોત નિપજ્યાં છે. જ્યારે અન્ય છ વ્યક્તિઓને ઇજા પહોંચતા તેઓને જામનગર હોસ્પિટલમાં ખસેડાયા છે. મૃતક પૈકી એક યુવાન સેનેટરી ઇન્સ્પેકટર તરીકે ફરજ બજાવતો હતો.
બીજી બાજુ તલાસરી નજીક ટેમ્પો ચાલકે બાઇકને 15 કિલોમીટર સુધી ઢસડ્યું
તો બીજી બાજુ ગુજરાત અને મહારાષ્ટ્રની બોર્ડર પર મહારાષ્ટ્રની હદમાં આવેલા તલાસરી (Talasari) નજીક એક ટેમ્પો ચાલકે હાઇવે પરથી પસાર થતા એક બાઈકને અડફેટે લીધું હતું. અમદાવાદ-મુંબઈ નેશનલ હાઈવે પર એક ટેમ્પો ચાલકે બાઈકને અડફેટે લેતા બાઈક ટેમ્પો નીચે ફસાઈ ગયું હતું. તેમ છતાં અકસ્માત સર્જ્યા બાદ ટેમ્પો ચાલકે પૂર ઝડપે ટેમ્પો હાઇવે પર દોડાવ્યો. એટલે કે, ટેમ્પોએ બાઇકને અડફેટે લઇ 15 કિમી સુધી હાઇવે પર ઢસડ્યું. 15 કિમી સુધી હાઈવે પર ટેમ્પો નીચે આતશબાજી થતી હોય તેવાં દ્રશ્યો સર્જાયા. જો કે, આ મામલે મહારાષ્ટ્ર પોલીસે ભીલાડ આવીને ટ્રક અને બાઇકનો કબ્જો મેળવ્યો છે. સદનસિબે આ બનાવમાં બાઇક ચાલકનો બચાવ થયો હતો. બાઇક ચાલકને સામાન્ય ઈજા પહોંચી હોવાનું ધ્યાનમાં આવ્યું છે.
સદનસીબે આ ઘટનામાં બાઈક ચાલકનો આબાદ બચાવ
મહારાષ્ટ્રના તલાસરીથી ભિલાડ સુધી ટેમ્પોની નીચે બાઈક ફસાયું હોવાથી રોડ સાથે બાઈકનું ઘર્ષણ થતાં 15 કિલોમીટર સુધી હાઈવે પર તણખલા ઝરતા જોવા મળ્યા હતાં. તમને જણાવી દઇએ કે, ભીલાડ નજીક ટેમ્પોને હાઇવેની બાજુમાં મૂકી ચાલક ઘટના સ્થળેથી ફરાર થઇ ગયો હતો. સદનસીબે આ ઘટનામાં બાઈક ચાલકનો આબાદ બચાવ થયો. બાઇક ચાલકને સામાન્ય ઇજા જ થઇ છે. આ કેસમાં મહારાષ્ટ્રના તલાસરીમાં અકસ્માત સર્જ્યા બાદ ટેમ્પોની નીચે બાઈક ફસાયું હોવા છતાં ઇરાદાપૂર્વક ટેમ્પોને ભીલાડ સુધી દોડાવનાર ચાલક વિરૂદ્ધ તલાસરી પોલીસે તપાસ હાથ ધરી છે.