ક્રાઈમ / વડોદરામાં બે ચરસ પેડલર ઝડપાયા, ડ્રગ્સનું નેટવર્ક ભેદી નાખવા પોલીસની મોટી કાર્યવાહી

• અલકાપુરી નજીકથી ઝડપાયો ચરસનો જથ્થો
• પોલીસે 2 આરોપીની કરી ધરપકડ
• પોલીસે સમગ્ર મામલે વધુ તપાસ હાથ ધરી

વડોદરામાં નશીલા દ્રવ્યો પકડવાના એક પછી એક બનાવ બની રહ્યા છે. અલકાપુરી વિસ્તારમાં ગઈકાલ સાંજે  સાડા ત્રણ લાખની કિંમતનો ચરસના જથ્થા સાથે પોલીસે બે ચરસ પેડલરને દબોચી લીધા હોવાનો બનાવ બન્યો છે. પોલીસે ચરસનું નેટવર્ક ભેદવા માટે બંનેની પૂછપરછ કરતા વડોદરામાં ચરસ સપ્લાય કરવાનું પગેરું બિહાર સુધી પહોંચ્યું છે. નશીલા દ્રવ્યોનો મોટો વેપાર ચાલી રહ્યો હોવાની વિગતોને પગલે વડોદરા પોલીસ કમિશનર દ્વારા મિશન ક્લીન હાથ ધરાયું છે. જે મિશન હેઠળ સ્કૂલોમાં અને કોલેજોમાં વિદ્યાર્થીઓને એલર્ટ કરવામાં આવી રહ્યા છે.

અલકાપુરી નજીકથી ઝડપાયો ચરસનો જથ્થો
વડોદરા શહેરના અલકાપુરી વિસ્તારમાંની  અગ્રસેન ભવન ગેસ્ટ હાઉસ નજીક ચરસની ડિલિવરી આપવામાં આવનાર હોવાની વિગતોને પગલે વડોદરા શહેર એસઓજીની ટીમે વોચ રાખી હતી. આ દરમિયાન પોલીસે યાકુતપુરા વિસ્તારના શાહ નવાજ ઉર્ફે શાનુ સલીમભાઈ શેખ તેમજ તેની સાથે બિહારના અજિમુદ્દીન અન્સારીને ચરસની ડિલિવરી આપતા ઝડપી પાડ્યા હતા. બંને ડ્રગ્સ પેડલર પાસે 4.50 લાખના ચરસ સાથે 7 લાખનો મુદ્દા માલ મળ્યો હતો. પોલીસે શાહ નવાજ ઉર્ફે શાનું પાસે થેલીમાંથી 3 લાખ ઉપરાંતની કિંમતનું 2 કિલો 55 ગ્રામ ચરસ કબજે કર્યું છે. જ્યારે તેનું સ્કૂટર, વેચાણના રોકડા રૂ. 1100 અને મોબાઈલ કબજે કર્યા હતા. જ્યારે બિહારના અજિમુદ્દીન પાસે રૂપિયા દોડ લાખ ઉપરાંતની કિંમતનું એક કિલો 24 ગ્રામ ચરસ તેમજ ચરસના વેચાણના રૂ. 1.60 લાખ ઉપરાંતનો મુદ્દામાલ ઝડપી પાડવામાં આવ્યું છે.

પોલીસે 2 આરોપીની કરી ધરપકડ
પોલીસની પ્રાથમિક તપાસમાં અજિમુદ્દીન છેલ્લા દસ મહિનામાં બિહારથી ચાર વાર ડ્રગ્સ લઈને વડોદરા આવ્યો હોવાની વિગતો જાણવા મળી છે. જેથી તેના મોબાઇલની કોલ ડીટેલને આધારે પોલીસે વધુ પૂછપરછ હાથ ધરી છે. આ ઉપરાંત તેની પાસેથી મળેલા રોકડા રૂપિયા 1.60 ક્યાંથી આવ્યા તે મુદ્દે પણ પૂછપરછ કરવામાં આવી રહી છે. ચરસનો જથ્થો લાવનાર અજિમુદ્દીને કબૂલ્યું હતું કે ચરસનો જથ્થો બિહારના ઈસ્માઈલ ઉર્ફે અલ્લુ શેખ પાસેથી મેળવતો હતો અને અલગ અલગ જગ્યાએ સપ્લાય કરતો હતો. જેથી પોલીસે ઈસ્માઈલને વોન્ટેડ જાહેર કરી અજિમુદ્દીનની વધુ પૂછપરછ હાથ ધરી છે.

 પોલીસે સમગ્ર મામલે વધુ તપાસ હાથ ધરી
વડોદરા શહેર અને જિલ્લામાં નશીલા દ્રવ્યોનો મોટો વેપાર ચાલતો હોવાથી ભૂતકાળમાં નાર્કોટિક્સ સેલ અને એટીએસ દ્વારા કરોડોનું ડ્રગ્સ પકડવામાં આવ્યું છે. ત્યારબાદ એસઓજી દ્વારા પણ વારંવાર નશીલા દ્રવ્યોના જથ્થા પકડવામાં આવી રહ્યા છે જોવાનું એ રહ્યું કે આવા નશીલા પદાર્થ નું વેચાણ કયારે બધ થશે તેમજ લોકોના જીંદગી સાથે છેડા કરનાર આરોપીઓ ક્યારે પકડાશે. બીજી તરફ મધ્ય ગુજરાત નસીલા પદાર્થનું હબ બની રહ્યું હોય તેવું લાગી રહ્યું છે.