OMG / જાપાનમાં અનોખું સ્ટેશનઃ ના ટિકિટ વિન્ડો-ના કાઉન્ટર, માત્ર સુંદરતા જોવા આવે છે ટૂરિસ્ટ

જાપાનનું સીરયુ મિહારશી એકી દુનિયાનું સૌથી અનોખું સ્ટેશન છે. અહીં ન તો ટિકિટ કાઉન્ટર છે-ન તો ટ્રેનની જાણકારી આપનારી હેલ્પ વિન્ડો. નિસિકી નદી પર બનેલા સ્ટેશન પર કોઈ એન્ટ્રી કે એક્ઝિટ પણ નથી. યામાગુચી પ્રાંતમાં બનેલું આ એકમાત્ર એવું રેલવે સ્ટેશન છે, જ્યાં ટૂરિસ્ટ માત્ર સુંદરતા જોવા આવે છે.
 

સીરયુ મિહારશી એકીનો અર્થ છે-એવું સ્ટેશન જ્યાંથી સ્પષ્ટ ઝરણાં જોવા જઈ શકાય છે. અહીં રેલવેથી જ પહોંચી શકાય છે. સ્ટેશનને એવું બનાવાયું છે કે અહીં આવતા-જતા લોકો સુંદરતાનો આનંદ ઉઠાવે અને પાછા ટ્રેનમાં બેસી જાય, કેમ કે અહીં ન તો રેમ્પ છે, ન તો રોકાવાની જગ્યા.
 

આ સ્ટેશન વર્ષમાં માત્ર એક વાર 17 માર્ચના રોજ ખુલ્લું મુકાય છે, તેને હજુ સુધી ગૂગલ મેપ પર સામેલ કરાયું નથી. તેની આસપાસની સાત ટકા જમીનને 2012માં નેચરલપાર્ક જાહેર કરાયું છે. અહીં આવનારા ટૂરિસ્ટ કુદરતની સુંદરતાને પોતાના કેમેરામાં કેપ્ચર કરવાનું ભૂલતા નથી.
 

જાપાનના લોકોને આ જગ્યા પાણી અને હરિયાળી માટે ખાસ પસંદ છે. સિંગલ રેલવે લાઈનવાળા આ રૂટથી રોજ 10 ટ્રેન પસાર થાય છે, તેમાં ચાર ટ્રેન અલગ અલગ રંગની, જેમ કે ગુલાલી, લીલી, આસમાની અને પીળી છે. વસંતની મોસમમાં ટૂરિસ્ટ આ રૂટથી યાત્રા કરે છે કે જેથી ઝરણાં, પહાડ અને ફૂલની સુંદરતા જોઈ શકાય. સ્ટેશન ઉપરાંત વચ્ચે એવી ઘણી જગ્યા છે કે જ્યાંથી ટૂરિસ્ટ ઈચ્છે તો ઊતરીને કુદરતી સૌંદર્યનો આનંદ લઈ શકે છે.