દેશનો GDPએ દેશના અર્થતંત્રના પાયા સમાન છે. દેશમાં ઘેરાતા મંદીના વાતાવરણ સામે GDP સતત ગબડી રહ્યો છે. રોજગારની બૂમો, માંગમાં ઘટાડો, ગ્રાહકોની ખર્ચ શક્તિમાં ઘટાડો અને કમરતોડ મોંઘવારીના સમયમાં રહસ્યમયી રીતે દેશના શાસક પક્ષની આવકમાં જંગી ઉછાળો નોંધાયો છે. દેશના GDP સાથે સરખાવતા આ આંકડા વધુ ચોંકાવનારા જણાય છે.
વર્ષ 2018-19માં રાજકીય પાર્ટીઓની બમ્પર કમાણીમાં
TMCની આવકમાં સૌથી વધારે વધારો
6 રાજકીય પાર્ટીઓની કુલ કમાણી જેટલી માત્ર એકલા ભાજપની
દેશના GDP અને ભાજપની આવકને વ્યસ્ત પ્રમાણમાં સંબંધ
2018-19ના પહેલા ક્વાર્ટરમાં દેશનો GDP વૃદ્ધિ દર 8% હતો જેમાંથી ડચકા ખાતો ખાતો અત્યારે 4.5%ની કંગાળ સપાટીએ છે. આવા સમયે જયારે એક વર્ષના ગાળામાં દેશનો GDP પૂરો 3.5% ઘટી ગયો છે ત્યારે ભાજપની આવક 2017-18માં 1027 કરોડથી વધીને 2018-19માં 2410 કરોડ થઇ હતી. આમ ભાજપની આવકમાં જંગી 1383 કરોડનો ઉછાળો નોંધાયો હતો.
કુલ કમાણીના મામલામાં સૌથી ઉપર બીજેપી (BJP) છે, જોકે, એક વર્ષ દરમિયાન સૌથી વધારે વૃદ્ધિ તૃણમૂલ કોંગ્રેસની કમાણીમાં થઇ છે. દેશનો વિકાસ દર (GDP) ભલે ધીમો પડી ગયો છે પરંતુ રાજકીય પાર્ટીઓની કમાણીમાં દર વર્ષે બમ્પર વધારો થઇ રહ્યો છે. તાજા આંકડાઓ મુજબ, નાણાકીય વર્ષ (2018-19) દરમિયાન રાષ્ટ્રીય રાજકીય પાર્ટીઓની કમાણીમાં 166 ટકાનો વધારો થયો છે અને હવે 6 પાર્ટીઓની કુલ કમાણી વધીને 3698 કરોડ રૂપિયાએ પહોંચી ગઇ છે.
6 રાજકીય પાર્ટીઓની કુલ કમાણી 3698 કરોડમાંથી 2410 કરોડ રૂપિયા એકલા બીજેપીના છે, જે તમામ પાર્ટીઓની કુલ કમાણીના 65.16 ટકા છે. એસોસિએશન ઓફ ડેમોક્રેટિક રિફોર્મ્સ (ADR)ની રિપોર્ટ મુજબ, નાણાકીય વર્ષ 2017-18 અને 2018-19ની વચ્ચે 6 રાજકીય પાર્ટીઓ (BJP, કોંગ્રેસ, CPM, BSP, TMC અને CPI) ની કમાણીમાં 2308.92 કરોડ રૂપિયાનો વધારો થયો છે. તેમાંથી 52 ટકા એટલે કે 1931.43 કરોડ રૂપિયા ઇલેક્ટોરલ બોન્ડ દ્વારા મળ્યા છે. નોંધનીય છે કે આ પૈકી ફક્ત CPI(M) એક માત્ર પક્ષ છે જેની આવકમાં એક વર્ષમાં વધારો થયો નથી.
કઇ પાર્ટીની કેટલી કમાણી
2014થી કેન્દ્રમાં સરકાર ચલાવી રહેલી ભાજપે 2018-19 નાણાકીય વર્ષ દરમિયાન પોતાની કુલ આવક 2410.08 કરોડ રૂપિયા જાહેર કરી છે. આ રકમમાંથી પાર્ટીએ 41.71 ટકા એટલે કે 1005.33 કરોડ રૂપિયા ખર્ચ કર્યા છે, આ ચૂંટણી વર્ષ હતું.
કોંગ્રેસને આ એક વર્ષમાં 918.03 કરોડ રૂપિયાની કમાણી થઇ છે, જેમાંથી પાર્ટીએ 51.19 ટકા એટલે કે 469.92 કરોડ રૂપિયા ખર્ચ કર્યા છે. મમતા બેનર્જીની તૃણમૂલ કોંગ્રેસની વાત કરવામાં આવે તો તેને એક વર્ષમાં 192.65 કરોડ રૂપિયાની કમાણી કરી છે. જેમાંથી પાર્ટીએ 11.50 કરોડ ખર્ચ કર્યો છે, જે કમાણીના 5.97 ટકા છે. CPMએ નાણાકીય વર્ષ 2018-19 દરમિયાન પોતાની આવક 100.96 કરોડ રૂપિયા જાહેર કરી છે અને તેણે આ આવકનો 75 ટકાથી વધારે ખર્ચ કર્યો છે, જે 76.15 કરોડ રૂપિયા છે.
રાજકીય પાર્ટીઓની આવક
BJP- એક વર્ષમાં 134 ટકા વૃદ્ધિ (1382.74 કરોડ)
2017-18 (1027.34 કરોડ)
2018-19 (2410.08 કરોડ)
કોંગ્રેસ - એકવર્ષમાં 360 ટકા વૃદ્ધિ (718.88 કરોડ)
2017-18 (199.15 કરોડ)
2018-19 (918.03 કરોડ)
તૃણમૂલ કોંગ્રેસ- એકવર્ષમાં 3628 ટકા વૃદ્ધિ (187.48 કરોડ)
2017-18 (5.167 કરોડ)
2018-19 (192.65 કરોડ)
શું કહે છે ADRનો રિપોર્ટ?
ADRએ પ્રકાશિત કર્યો વર્ષ રાજકીય પક્ષોના ઓડીટેડ વાર્ષિક હિસાબો અંગેનો રિપોર્ટ
ADRના રિપોર્ટની તારણો સૂચવે છે ચૂંટણી વર્ષમાં વધુ આવક મેળવે છે રાજકીય પક્ષો
2019 હતુ લોકસભાની ચૂંટણીનું વર્ષ, રાષ્ટ્રીય-પ્રાદેશિક પક્ષોની વધી છે આવક
પ્રાદેશિક પક્ષો કરતાં રાષ્ટ્રીય પક્ષોને વધુ મળે છે દાન અને સ્વૈચ્છિક ફાળો
ઇલેક્ટ્રોલ બોન્ડ દ્વારા વધુ આવક મેળવે છે રાષ્ટ્રીય પક્ષો, ભાજપ સૌથી મોખરે
દેશના 6 રાષ્ટ્રીય પક્ષોની આવક પૈકી 52 ટકા આવક ઇલેક્ટ્રોલ બોન્ડ થકી થઇ
ઇલેક્ટ્રોલ બોન્ડ કોણે ખરીદ્યા તેની માહિતી જાહેર જનતાને અપાતી નથી, પારદર્શીતા છે જરૂરી
ભાજપને વર્ષ 2017-18 કરતાં 2018-19માં 134 ટકા આવક વધુ પ્રાપ્ત થઇ હતી
ભાજપને 2018-19માં પ્રાપ્ત થઇ કુલ રૂ. 2,410 કરોડ
2017-18માં ભાજપને રૂ. 1,027 કરોડની પ્રાપ્ત થઇ હતી વાર્ષિક આવક
કોંગ્રેસને 2017-18માં પ્રાપ્ત થઇ હતી રૂ. 199 કરોડની આવક
વર્ષ 2018-19માં કોંગ્રેસને પ્રાપ્ત થઇ રૂ. 918 કરોડની આવક
વર્ષ 2018-19માં કોંગ્રેસને ગત વર્ષની સરખામણીએ પ્રાપ્ત થઇ 360 ટકા વધુ આવક
વર્ષ 2017-18માં AITCને પ્રાપ્ત થઇ હતી ફક્ત રૂ. 5.1 કરોડની આવક
AITCને વર્ષ 2018-19ના વર્ષમાં પ્રાપ્ત થઇ રૂ. 187 કરોડની આવક
વર્ષ 2018-19માં સૌથી વધુ આવકમાં વધારો AITCને થયો
BSP અને CPMને બેંક આવકની થઇ સૌથી વધુ આવક
BSP અને CPMને 2018-19માં રૂ. 38 કરોડની થઇ બેંક વ્યાજની આવક
BJPને વર્ષ 2018-19માં ઇલેકટ્રોલ બોન્ડ થકી પ્રાપ્ત થયા રૂ. 1,450 કરોડ
કોંગ્રેસને વર્ષ 2018-19માં ઇલેક્ટ્રોલ બોન્ડના માધ્યમથી મળ્યા રૂ. 383 કરોડ
AITCને ઇલેકટ્રોલ બોન્ડથી પ્રાપ્ત થયા હતા રૂ. 97 કરોડ
રાષ્ટ્રીય પક્ષો બાદ AITCને ઇલેક્ટ્રોલ બોન્ડથી વધુ થઇ આવક
ચૂંટણી પંચે રાજકીય પક્ષોના 2018-19ના ઓડિટેડ વાર્ષિક હિસાબો વેબસાઇટ ઉપર 9, જાન્યુઆરી-2020ના રોજ અપલોડ કર્યા
રાજકીય પક્ષો પારદર્શી બને તે માટે RTI હેઠળ લાવવા કર્મશીલોની છે માંગ
રાજકીય પક્ષો દ્વારા 24-Aની તમામ વિગતો ભરી ચૂંટણી પંચને સોંપવું જોઇએ
24-A ફોર્મની એક પણ વિગત વગરનું ફોર્મ ચૂંટણીપંચે સ્વીકારવું ન જોઇએ
રાજકીય પક્ષોને દાન કે ફાળા આપનારની તમામ વિગતો RTI હેઠળ લાવવી જોઇએ