અમદાવાદ / નશાની લત સંતોષવા યુવકે પૂર્વ પત્નીના ફોટો વાઈરલ કરવાની ધમકી આપી, 3 લાખ માંગ્યા, શાહઆલમનો બનાવ

• નશાખોર યુવકે પૂર્વ પત્નીના ફોટો વાઈરલ કરવાની ધમકી આપી રૂ. ત્રણ લાખ માગ્યા
• ત્રણ લાખ રૂપિયાની માગણી કરતાં મામલો પોલીસ સ્ટેશન સુધી પહોંચ્યો

અમદાવાદના શાહઆલમ વિસ્તારમાં રહેતા ૬૧ વર્ષિય સલીમખાને ઇસનપુર પોલીસ સ્ટેશનમાં જમાઇ અઝીમ રિયાઝ શેખ (રહે મદિનાપાર્ક, સુરત) વિરુદ્ધ ધમકીની ફરિયાદ કરી છે. સલીમખાન શાહઆલમ ટોલનાકા પાસે ટ્રાન્સપોર્ટની ઓફિસ ધરાવીને પોતાનું તેમજ પરિવારનું ગુજરાન ચલાવે છે. સલીમખાનના પરિવારમાં પત્ની, એક દીકરો અને ત્રણ દીકરી છે. સલીમખાનની સૌથી નાની દીકરી રેશમાનાં લગ્ન વર્ષ ૨૦૦૮માં સુરતમાં રહેતા અઝીમ શેખ સાથે થયાં હતાં. લગ્ન બાદ રેશમાએ એક પુત્રને જન્મ આપ્યો હતો પરંતુ ધીમે ધીમે રેશમાને ખબર પડી હતીકે અઝીમ ડ્રગ્સનો નશો કરવા માટે ટેવાયેલો છે. અઝીમ અનેક વખત રેશમા પાસે રૂપિયાની માગણી કરીને મારઝૂડ કરતો હતો. રેશમાનું જીવન બદતર થઇ જતાં છ મહિના પહેલા તેણે અઝીમ સાથે છૂટાછેડા લઇ લીધા હતા. રેશમા હાલ તેના પિયરમાં માતા પિતા સાથે રહે છે. જાન્યુઆરી મહિનામાં અઝીમે રેશમાને ફોન કરીને મળવા માટેનું દબાણ શરૂ કર્યું હતું. 

જાનથી મારી નાખવાની ધમકી પણ આપી

વાત એટલી હદે વકરી કે અઝીમ શાહઆલમ રેશમાને લેવા માટે આવ્યો હતો અને તેને જાનથી મારી નાખવાની ધમકી પણ આપી હતી. આ સાથે અઝીમે રેશમાના ફોટોગ્રાફ્સ વાઈરલ કરવાની ધમકી આપીને ત્રણ લાખ રૂપિયાની પણ માગણી કરી હતી. રૂપિયા નહીં આપતાં રેશમાને અઝીમ ફોન પર ગાળો બોલતો હતો અને જાનથી મારી નાખવાની ધમકી પણ આપતો હતો. થોડા દિવસ પહેલાં પણ અઝીમ રેશમાના ઘરે પહોંચી ગયો હતો જ્યાં તેણે ઘરના તમામ સભ્યોને મારી નાખવાની ધમકી આપી હતી. અઝીમની ધમકીથી કંટાળીને રેશમાના પિતાએ ઇસનપુર પોલીસ સ્ટેશનમાં ફરિયાદ કરી છે. પોલીસે ગુનો દાખલ કરીને તપાસ શરૂ કરી છે. (આરોપી સિવાયનાં તમામ પાત્રોનાં નામ બદલ્યાં છે) 

પાર્સલ માટે ગઠિયાએ ફક્ત બે રૂપિયા ટ્રાન્સફર કરાવી એક લાખ સેરવી લીધા 

બીજી બાજુ તમારું પાર્સલ હોલ્ડ પર છે, બે રૂપિયા લિંકમાં ટ્રાન્સફર કરશો તેમ કહી ગઠિયાએ યુવતીને જાળમાં ફસાવી એક લાખ રૂપિયા સેરવી લીધા હોવાની ઘટના સામે આવી છે. શેલા ઓર્ચિડ સ્કાયમાં રહેતાં નિરાલીબહેન ભટ્ટે બોપલ પોલીસ સ્ટેશનમાં ઠગાઈની ફરિયાદ નોંધાવી છે. નિરાલી ઇવેન્ટ કંપનીમાં મેનેજર તરીકે ફરજ બજાવે છે.થોડા દિવસ પહેલાં અજાણ્યા નંબર પરથી નિરાલી પર ફોન આવ્યો હતો. ફોન કરનારે નિરાલીને કહ્યું હતું કે તમે બ્લૂૂકાર્ટમાંથી મંગાવેલી વસ્તુ પરત ગઈ છે, જેથી તમારું પાર્સલ હોલ્ડ પર રાખવામાં આવ્યું છે. હું તમારા વોટ્સએપમાં એક લિંક મોકલું છું તે એપ ખોલીને બે રૂપિયા મોકલી આપવાના રહેશે. નિરાલીએ ગઠિયાના કહ્યા મુજબ બે રૂપિયા ટ્રાન્સફર કરી દીધા હતા.ત્યાર બાદ બીજા દિવસે બ્લૂકાર્ટમાંથી નિરાલીએ મંગાવેલાં ચશ્માં આવી ગયાં હતાં. ચશ્માં આવી ગયા બાદ સાંજના સમયે નિરાલીના ખાતામાંથી ટુકડે ટુકડે એક લાખ રૂપિયા કપાઈ ગયા હતા. નિરાલી પર રૂપિયા ડેબિટ થયાનો મેસેજ આવતાં જ તે ચોંકી ગઈ હતી. ‌નીરાલીએ તરત આ અંગે બોપલ પોલીસ સ્ટેશનમાં ઠગાઈની ફરિયાદ નોંધાવી હતી. પોલીસે ફરિયાદના આધારે અજાણ્યા શખ્સ વિરુદ્ધ ગુનો નોંધી વધુ તપાસ હાથ ધરી છે.