પોલીસ સ્ટેશનમાં યુવતી અને સગીરાએ બાથરૂમમાં જઇને ડ્રગ્સનો નશો કર્યો
મહિલા પોલીસ કર્મચારીએ બન્ને જણાને ફટાકાર્યાં
પોલીસ સ્ટેશનમાં જ નશો
રામોલ પોલીસે યુવક, સગીરા તેમજ ટિકટોક સ્ટાર યુવતીની અટકાયત કરી હતી. જોકે યુવતીને છોડી મૂકતાં માત્ર યુવકની ધરપકડ કરી હતી. યુવતી અને સગીરા જ્યારે પોલીસ સ્ટેશનમાં હાજર હતાં ત્યારે તેમણે ડ્રગ્સનો નશો કરીને સૂઇ જવાથી મહિલા પોલીસ કર્મચારીએ બન્ને જણાને ફટાકાર્યાં હતાં. મહિલા પોલીસને બન્ને પાસેથી સિગારેટનું પેકેટ મળી આવ્યું હતું.
નશાના રવાડે ચડાવી
રામોલમાં સગીરાને ભગાડી જનાર યુવકની પોલીસ ત્રણ દિવસ પહેલાં ધરપકડ કરી હતી. જેમાં તેણે પોલીસ સ્ટેશનમાં કબૂલાત કરી છે કે તે સગીરાને નશાની ગોળીઓ આપતો હતો. સગીરાની માતાએ આક્ષેપ કર્યા છે કે તેની દીકરી ટિકટોક પર અમરાઇવાડીની એક ટિકટોક સ્ટાર યુવતીને ફોલો કરતી હતી. બંને વચ્ચે મિત્રતા થતાં એક બીજાનો નંબર આપલે કર્યો હતો. યુવતીએ સગીરાને ડ્રગ્સના રવાડે ચડાવી દીધી હતી. થોડાક દિવસ પહેલાં સગીરાની માતાએ ફૈજલ અને યુવતી સાથે નશો કરતાં ઝડપી લીધી હતી. તા.૧૪ના રોજ સગીરા ફૈજલ સાથે નાસી ગઇ હતી. રવિવારે ફૈજલ અને સગીરા અને યુવતી એક યુવકનાં ઘરે નહાવા માટે ગયાં હતાં. જ્યાં પોલીસે તેમને ઝડપી લીધાં હતાં.
પોલીસ ફૈજલની પોક્સો એક્ટ હેઠળ ધરપકડ કરી હતી અને સગીરા અને યુવતીને પોલીસ સ્ટેશનમાં લાવી હતી. આ બંને પોલીસ સ્ટેશનના બાથરૂમમાં જઇને ડ્રગ્સનો નશો કરી આવ્યાં હતાં અને થોડા સમય પછી સૂઇ ગયાં હતાં. પોલીસ કર્મચારીઓએ બંનેને સૂઇ ગયેલાં જોતાં શંકા ગઇ હતી અને તેમને ઉઠાડી મહિલા પોલીસે માર માર્યો
હતો. પોલીસને બંને પાસેથી સિગારેટ મળી હતી. આ ચકચારી કેસમાં પોલીસ ટિકટોક સ્ટારને છોડી મૂકતાં તર્ક વિતર્કો સર્જાયા છે.