અમદાવાદ / પોલીસ ઊંઘે છે? થર્ટી ફર્સ્ટ માટે બુટલેગરો સ્ટોક સાથે તૈયારઃ દારૂના ભાવ બમણા થયા

• યુવાનોમાં લાઇટ કિક આપતી બ્રિઝર હોટ ફેવરિટ
• સરદારનગર સહિતના વિસ્તારોમાં પોલીસની વોચ
• પણ હજુ સુધી કોઈ મોટી માછલી હાથમાં નથી આવી

ક્રિસમસની શરૂઆત થાય ત્યારે પોલીસ એક્શન મોડમાં આવી જાય છે અને બુટલેગરો બેફામ બની જાય છે. એક તરફ રાજ્યના પોલીસવડા શિવાનંદ ઝાએ તમામ પોલીસને બુટલેગરો પર લગામ લગાવવા માટે અને રોજેરોજ દારૂની ડ્રાઇવ આયોજન કરવા માટેના આદેશ આપી દીધા છે.

અમદાવાદના દીવ-દમણ ગણાતા સરદારનગર, કુબેરનગર જેવા વિસ્તારમાં પોલીસ રોજેરોજ ડ્રાઇવ કરી રહી છે અને દારૂ‌િડયા તેમજ નાના-મોટા બુટલેગરોને પકડી રહી છે ત્યારે શહેરના અન્ય વિસ્તારમાં ચાલતા દારૂના અડ્ડા પર પોલીસ રોજેરોજ સર્ચ કરી રહી છે.

પોલીસની કામગીરીથી વાકેફ બુટલેગરો પણ હવે તેનાથી બે કદમ આગળ ચાલી રહ્યા છે. કેટલાક લાં‌ચિયા પોલીસ કર્મચારીઓના કારણે બુટલેગરોને પહેલાંથી જાણ થઇ જાય છે કે કેટલા વાગે ડ્રાઇવ આવવાની છે. એકદમ સિક્રેટ ગણાતી પોલીસની રેડની જાણ બુટલેગરોને હોવાથી પોલીસને જોઇએ તેવી સફળતા મળતી નથી.

ક્રિસમસના તહેવારમાં બુટલેગરો પોતાના ઘરે દારૂનો જથ્થો રાખવાની જગ્યાએ અડોશપડોશમાં ભાડેથી મકાન રાખીને દારૂનો જથ્થો છુપાવી રહ્યા છે. એક બુટલેગરે નામ નહીં આપવાની શરતે જણાવ્યું છે કે નાતાલનો તહેવાર હોવાથી નવેમ્બર મહિનાથી જ દારૂનો સ્ટોક કરી રાખવામાં આવે છે. સામાન્ય રીતે દારૂનો ભાવ જે હોય છે તેના કરતાં બમણા ભાવે ક્રિસમસમાં વેચવામાં આવે છે.

સામાન્ય રીતે વાઇન, વ્હીસ્કી, બિયર વોડકા પીવામાં આવે તો મોઢામાંથી દુર્ગંધ આવે છે, જેના કારણે પોલીસે તેમને આસાનીથી પકડી શકે છે તેવામાં હવે બકાડી બ્રિઝર જે ફ્રૂટ બિયર ગણાવવામાં આવે છે તેનું ચલણ યુવાધનમાં વધુ જોવા મળ્યું છે.  

હાલ મોટા બુટલેગરો નાના-નાના બુટલેગરોને ઊંચા ભાવે દારૂની પેટી આપે છે. એક બિયરની પેટીમાં ર૪ બિયરની બોટલ હોય છે જ્યારે દારૂની પેટીમાં ૧ર બોટલ હોય છે. મોટા બુટલેગરો ૬ હજાર રૂપિયાની બિયરની પેટી નાના બુટલેગરોને આપે છે જ્યારે દસ હજારથી ર૦ હજાર સુધી વ્હીસ્કી, વાઇનની પેટી આપે છે. 

સામાન્ય દિવસોમાં બિયરનો ભાવ ર૦૦ રૂપિયાથી રપ૦ રૂપિયા હોય છે ત્યારે ક્રિસમસના સમયે બિયરનો ભાવ ૩૦૦ થી ૪૦૦ રૂપિયા જોવા મળે છે. દારૂની બોટલ પણ એક હજાર રૂપિયાથી શરૂ થઇને રપ૦૦ સુધીમાં વેચાય છે.