સારા સમાચાર / યુએસ કોર્ટના આ નિર્ણયથી ટ્રમ્પને મોટો ફટકો, પરંતુ ભારતીયો માટે મોટી રાહતના સમાચાર 

• ભારતીયોને મોટી સંખ્યામાં મળી શકે છે લાભ 
• બરાક ઓબામાના સમયની શરૂ કરેલી યોજનાને ફરી લાગૂ કરવા આદેશ 
• ટ્રમ્પે આ યોજનાની વિરુદ્ધમાં નિર્ણય લીધો હતો, પરંતુ અદાલતે પલટાવ્યો 

ટ્રમ્પ પ્રશાસન દ્વારા 2017માં બાલ્યાવસ્થામાં આવેલા લોકોની સામે કાર્યવાહીને સ્થગિત કરતી યોજનાને સમાપ્ત કરવાની કોશિશ કરી હતી, પરંતુ સર્વોચ્ચ અદાલતે આ પ્રયત્નને જૂનમાં નિષ્ફળ કરી દીધો હતો. 

બે વર્ષ વધારી યોજનાની મુદ્દત 

યુએસના ન્યુયોર્કની પૂર્વી જિલ્લા અદાલતે આ મામલે (DACA, Deferred Action for Childhood Arrivals) ની અવધિ હજુ બે વર્ષ વધારીને તેમાં સોમવારથી નવી એપ્લિકેશન સ્વીકાર કરવાનો આદેશ આપ્યો હતો, આમ સપ્ટેમ્બર 2017 પછી હવે તે લોકો પણ અહીં એપ્લાય કરી શકશે, જેઓ તેની પહેલા તેને યોગ્ય નહોતા. 

યોજના શું છે?

આ યોજના ગેરકાયદેસર વસાહતીઓ કે જેઓ યુનાઇટેડ સ્ટેટ્સમાં સંતાન તરીકે પ્રવેશ્યા હતા તેમને દેશનિકાલથી રક્ષણ પૂરું પાડે છે. ન્યાયાધીશ ગૌરોફિસે પોતાના આદેશમાં લખ્યું છે કે, "કોર્ટ માને છે કે આ  રાહત વાજબી છે."

નોંધનીય છે કે લગભગ 6,40,000 લોકો DACA પ્રોગ્રામ હેઠળ નોંધાયેલા છે. સાઉથ એશિયન અમેરિકન લીડિંગ ટુગેધર SALT દ્વારા વર્ષ 2019 માં જાહેર કરાયેલા અહેવાલ મુજબ ઓછામાં ઓછા 6,30,000 ભારતીય દસ્તાવેજો વિના યુ.એસ. માં રહે છે. વર્ષ 2010 કરતા આ સંખ્યા 72 ટકા વધારે છે. રિપોર્ટ અનુસાર હાલમાં દક્ષિણ એશિયન DACA ના 4,300 સક્રિય લાભાર્થીઓ છે જ્યારે ઓગસ્ટ 2018 માં 2,550 ભારતીય  DACA ના સક્રિય લાભાર્થી હતા.

માત્ર 13 ટકા લોકોએ જ લીધો છે લાભ 

SALT મુજબ, યુ.એસ. માં આશરે 20 હજાર ભારતીય લોકો DACA માટે લાયક છે, પરંતુ તેમાંથી માત્ર 13 ટકા લોકોએ જ તેમાં અરજી કરી છે અને તેનો લાભ મેળવ્યો છે. રિપોર્ટ અનુસાર, આ યોજના હેઠળ 1,300 પાકિસ્તાની, 470 બાંગ્લાદેશી, 120 શ્રીલંકા અને 60 નેપાળી લોકો લાભ મેળવી રહ્યા છે. ટ્રમ્પ વહીવટ તંત્ર આ નિર્ણય સામે ફેડરલ કોર્ટમાં અપીલ દાખલ કરી શકે છે અથવા સુપ્રીમ કોર્ટમાં અરજી કરી શકે છે અને સ્ટેની વિનંતી કરી શકે છે.