ગરમીનો પ્રકોપ / ગુજરાતમાં હજુ 2 દિવસ આકરા, 10 શહેરોમાં પારો 42 ડિગ્રીને પાર પહોંચતા લોકો ત્રાહિમામ

• રાજ્યમાં હજુ ગરમીનો પ્રકોપ રહેશે યથાવત
• હવામાન વિભાગે આગામી 48 કલાક માટે કરી આગાહી
• 2 દિવસ બાદ ગરમીના પ્રમાણમાં નોંધાશે ઘટાડો

રાજ્યમાં હજુ ગરમીનો પ્રકોપ રહેશે યથાવત

રાજ્યમાં એપ્રિલ મહિનામાં જ ગરમી નવા નવા રેકોર્ડ તોડી રહી છે. ત્યારે શુક્રવારે પણ રાજ્યના 10 શહેરોમાં ગરમીનો પારો 42 ડિગ્રીને પાર પહોંચી ગયો છે. આ સિવાય અન્ય શહેરોમાં પણ ગરમીથી લોકો ત્રાહિમામ પોકારી ઉઠ્યા છે. હવામાન વિભાગની આગાહી અનુસાર આગામી 48 કલાક સુધી હજુ પણ ગરમી વધવાની આગાહી કરવામાં આવી છે.

2 દિવસ બાદ ગરમીના પ્રમાણમાં નોંધાશે ઘટાડો

રાજ્યમાં હવામાન વિભાગના જણાવ્યા અનુસાર ગુજરાતમાં આગામી 48 કલાક સુધી ગરમીનો પ્રકોપ યથાવત રહેશે.જો કે, આ બે દિવસ બાદ ગરમીમાં આંશિક ઘટાડો થવાના સંકેત છે. હવામાન વિભાગની આગાહી અનુસાર જાણકારી મુજબ તાપમાનમાં 2 થી 3 ડિગ્રી જેટલો  ઘટાડો નોંધાઈ શકે છે. 

નાગરિકોને બીન જરૂરી ઘરની બહાર ન નીકળવાની સલાહ  

ઉલ્લેખનીય છે કે, એક તરફ રાજ્યના કાળઝાળ ગરમીનો માહોલ છે. અમદાવાદમાં ગરમીનો પારો 44ને પાર પહોંચી જતાં તંત્ર દ્વારા રેડ એલર્ટ જાહેર કરવામાં આવ્યું છે. બીજી તરફ નાગરિકોને પણ બીન જરૂરી ઘરની બહાર ન નીકળવાની અપીલ પણ કરાઈ છે. ત્યારે રાજ્યમાં આગામી બે દિવસ બાદ રાજ્યમાં વેસ્ટર્ન ડિસ્ટર્બન્સને કારણે ગરમીમાં આશંકિ રાહત મળશે. 

રાજ્યના 10 શહેરોમાં ગરમીનો પારો 42 ડિગ્રીને પાર પહોંચ્યો 

રાજ્યમાં શુક્રવારે  કંડલામાં 44 ડિગ્રી, રાજકોટમાં 42.7 ડિગ્રી, અમેરેલીમાં 43.4 ડિગ્રી, અમદાવાદમાં 43.3 ડિગ્રી, ભાવનગરમાં 43.3 ડિગ્રી, ગાંધીનગરમાં 42.3 ડિગ્રી, વડોદરામાં 42.2 ડિગ્રી, ડીસામાં 42 ડિગ્રી, પાટણમાં 42 ડિગ્રી, ભૂજમાં 41.2 ડિગ્રી તાપમાન નોંધાયું હતું.