સૌરાષ્ટ્રની ઉત્સવપ્રિય પ્રજા માટે રાજકોટમાં યોજાતા લોકોમેળામાં કોરોનાને પગલે માસ્ક પહેરવું ફરજિયાત કરવામાં આવ્યું છે.
રાજકોટમાં યોજાશે સૌરાષ્ટ્રનો સૌથી મોટો લોકમેળો
લોકમેળામાં ભીડને લઈને તંત્રનો નિર્ણય
કોરોનાના કેસ વધતા મેળામાં માસ્ક ફરજિયાત
કોરોનાકાળના 2 વર્ષ બંધ રહ્યા બાદ રાજકોટમાં ચાલુ વર્ષે લોકમેળાનું આયોજન કરવામાં આવ્યું છે. જેને લઇને રાજકોટ સહીત સૌરાષ્ટ્રવાસીઑમાં અનેરો આણંદ જોવા મળી રહ્યો છે. તંત્ર દ્વારા તડામાર તૈયારીઑ આદરી દેવામાં આવી છે. આગામી 17 થી 21 ઓગસ્ટ દરમિયાન આ મેળો યોજાશે. તેવામાં આ મેળાને લઇ રાજકોટ મહાનગરપાલિકાએ ભીડને કાબુમાં રાખવા અને કોરોનાને ફેલાતો અટકાવવા માસ્ક ફરજિયાત કર્યું છે.
લોકમેળા બાદ કોરોનાના કેસ ન વધે તે માટે માસ્ક ફરજિયાત કરાયું
જન્માષ્ટમી સહીતના તહેવારોએ આંગણે ટકોરો માર્યો છે. તેવામાં રંગીલા રાજકોટના રેષકોર્ષ મેદાનને આંગણે લોકમેળાનું આયોજન કરવામાં આવ્યું છે. એક બાજુ કોરોનાની ચોથી લહેરના ભણકારા વચ્ચે કોરોના કેસો વધી રહ્યા છે અને આગામી સમયમાં લોકમેળો પણ યોજાઇ રહ્યો છે. ત્યારે આવી સ્થિતિમાં કોરોનાને મોકળુ મેદાન ન મળે તે માટે લોકમેળામાં ભીડને લઈને રાજકોટ મહાનગરપાલિકા દ્વારા માસ્ક અંગેનો નિર્ણય કરવામા આવ્યો છે અને લોકમેળામાં માસ્ક ફરજિયાત કરવામાં આવ્યું છે. માસ્ક વગર મેળામાં એન્ટ્રી પર પ્રતિબંધ લગાવી દેવામાં આવ્યો છે. કોરોનાના વધતા કેસને ધ્યાનમાં રાખીને લોકોની સલામતીના ભાગરૂપે તંત્ર દ્વારા આ નિર્ણય કરવામાં આવ્યો છે. મહત્વનું છે કે ભાતીગળ સંસ્કૃતિને ઉજાગર કરતાં આ મેળાની લાખો લોકો મોજ માણતા હોવાથી લોકમેળા બાદ કોરોનાના કેસોમાં ઉછાળો આવવાની ભીતિ સર્જાતી હોવાથી માસ્ક ફરજિયાત કરાયું છે.
કોરોનાને પગલે બે વર્ષથી મેળો હતો બંધ
સૌરાષ્ટ્રમાં વર્ષોથી લોકમેળાઓનું આગવું મહત્વ રહ્યું છે. શ્રાવણ મહિનામાં રાજકોટના રેસકોર્ષ મેદાનને આંગણે 5 દિવસ મેળાનું આયોજન કરવામાં આવે છે. સૌરાષ્ટ્રના સૌથી મોટા આ લોક મેળામાં ગુજરાતના અન્ય પ્રાંતો સહિત સૌરાષ્ટ્રના ખૂણે ખૂણેથી 10 લાખ ઉપરાંત લોકો મેળાની મોજ માણતા હોય છે. પરંતુ છેલ્લા બે વર્ષથી કોરોનાએ કેડો ન છોડતા લોક મેળાના આયોજન પણ બંધ રાખવામાં આવ્યા હતા. ત્યારબાદ કોરોનાની સ્થિતિ કાબૂમાં રહેશે તો ભાતીગળ લોકમેળાનું જાજરમાન આયોજન કરવામાં આવશે. તેમ કલેકટરે 4 મે ના રોજ મિટિંગમાં જણાવ્યું હતું. જેને પગલે હાલ કોરોના કેસ ઘટયા હોવાથી મેળાનું નિયમોના પાલન સાથે આયોજન કરવા લીલીઝંડી અપાઈ હતી.