ઘટસ્ફોટ / વડોદરાના ગેરકાયદે વ્હાઇટ હાઉસ મામલે 9 વર્ષથી તંત્રને હતી જાણ છતાં કેમ મૌન! અન્ય જમીન મામલે પણ થયો ચોંકાવનારો ખુલાસો

• સરકારી જમીન પર ગેરકાયદે બંધાયેલ વ્હાઇટ હાઉસ બંગલાનો મામલો
• સરકારી જમીન પર ગેરકાયદે બાંધકામની 9 વર્ષથી તલાટીને હતી ખબર
• કલેક્ટર કચેરીના તંત્રએ ગેરકાયદે બાંધકામની જાણ હોવા છતાં પગલાં ન ભર્યા

વડોદરામાં સરકારી જમીન પર બનેલ વ્હાઇટ હાઉસ બંગલાનો વિવાદ ચર્ચાનો વિષય બન્યો છે. વડોદરામાં વ્હાઈટ હાઉસની જમીનમાં લેન્ડ ગ્રેબિંગ મામલે તપાસ ચાલી રહી છે. ત્યારે આ મામલે વધુ એક મોટો ખુલાસો થયો છે. તપાસમાં સામે આવ્યું છે કે, સરકારી જમીન પર ગેરકાયદે બાંધકામની 9 વર્ષથી તલાટીને ખબર હતી. તલાટીએ લેન્ડ રેકર્ડમાં વર્ષ 2012-13માં ગેરકાયદે બાંધકામ અંગે એન્ટી પાડી હતી. 

સરકારી જમીન પર બનાવી કાનનવિલા સાઈટ 
સાથે જ તપાસમાં એવું પણ સામે આવ્યું છે કે તલાટીએ લેન્ડ રેકર્ડમાં "બી.પ. બાંધકામ" તેવી સ્પષ્ટ એન્ટ્રી પાડી હતી. છેલ્લા 9 વર્ષથી ગેરકાયદેસર બાંધકામની જાણ હોવા છતાં કલેક્ટર કચેરીના તંત્રએ કોઈ પગલાં ન ભર્યા. આ ઉપરાંત આ ગેરકાયદેસર બાંધકામ કરનારાએ બાજુની જ સરકારી જમીન પર કાનન વિલા નામની એક સાઈટ બનાવી હતી. તેણે કાનન વિલામાં 27 લોકોને દસ્તાવેજ પણ કરી આપ્યા હતા. બોગસ બિન ખેતીનો હુકમ, બોગસ રજા ચિઠ્ઠી છતાં તંત્રએ કોઈ કાર્યવાહી કરી નહોતી. 

દબાણો તોડવા નોટિસો
સરકારી જમીન પર ગેરકાયદેસર બાંધકામ કરાયેલ વ્હાઇટ હાઉસ નામે ઓળખાતા લક્ષ્મી નિવાસ નામના બંગલાને સ્વેચ્છાએ તોડી નાખવા માટે મામલતદાર કચેરી દ્વારા નોટિસ આપવામાં આવી છે. તો તેની નજીક આવેલા કાનન વિલા સ્કીમમાં દસ્તાવેજો કરી લેનાર 27ને પણ નોટિસો આપી સ્વેચ્છાએ તોડી પાડવાની સૂચના આપી છે.

શું છે સમગ્ર મામલો?
વડોદરામાં ભૂમાફીયા સંજયસિંહ પરમારે દંતેશ્વર કસ્બાની વાઘોડિયા રોડ ડી માર્ટની પાછળ આવેલી 100 કરોડની કિંમતની સરકારી જમીન ઉપર શરત ફેર અને બિનખેતીના ખોટા દસ્તાવેજો બનાવ્યા હતા. આ સાથે આ જમીન ઉપર પોતાનો આલિશાન બંગલો ઉપરાંત ડુપ્લેક્ષની સ્કીમ પણ મૂકી હતી. ઉપરાંત આ સ્કીમના ડુપ્લેક્ષના 27 લોકોને દસ્તાવેજો પણ કરી આપ્યા હતા. જે બાદ આ વ્હાઇટ હાઉસ અને કાનન વિલાની જમીન સરકારી હોવાનું સામે આવ્યું હતું. 

આ મામલો બહાર આવ્યા બાદ કલેક્ટર દ્વારા સુઓમોટો કરી ડે.કલેક્ટરને તપાસ સોંપી હતી. આ જમીન બાબતે પૂર્વ વિપક્ષી નેતાએ પણ કલેક્ટર, મુખ્યમંત્રી અને હાઈકોર્ટમાં પણ અરજી કરી હતી. લેન્ડગ્રેબિંગ કમિટીના આદેશથી પોલીસે ગુનો દાખલ કર્યો હતો. વડોદરાના વ્હાઈટ હાઉસની જમીનમાં લેન્ડ ગ્રેબિંગ મામલે ક્રાઇમ બ્રાન્ચે તપાસનો ધમધમાટ શરુ કર્યો છે. ક્રાઇમ બ્રાંચે ભૂમાફીયા સંજયસિંહ પરમારની ધરપકડ કરી હતી. આ સાથે ક્રાઇમ બ્રાંચની ટીમે આરોપીને સાથે રાખી કન્સ્ટ્રક્શન સાઇટ ઉપર પહોંચીને પંચનામું સહિત વિવિધ દસ્તાવેજો કબજે કર્યાં હતા.