ચીનમાં હાબેઇ પ્રાંતમાં એક ૧૮ વર્ષની યુવતીનો મૃતદેહ કબર ખોદીને કોઇ ચોરી ગયું. પોલીસ આ મામલે તપાસ કરી રહી છે અને તેમને શંકા છે કે કદાચ સ્થાનિક લોકોમાં પ્રવર્તતી ભૂતિયા લગ્નની પરંપરાને કારણે આમ થયું હશે.
ચીનનાં કેટલાક અંતરિયાળ ગામોમાં પ્રથા છે કે જો યુવાન છોકરો કે છોકરી લગ્ન પહેલાં મરી જાય તો તેમના મૃતદેહનાં લગ્ન કરાવવામાં આવે છે. આ માટે લોકો બીજા મૃત છોકરા-છોકરીના મૃતદેહનો ઉપયોગ કરે છે.
નવાઇની વાત એ છે કે આ મૃત છોકરીના પરિવારને ત્યાં થોડાક દિવસ પહેલાં એક અજાણી વ્યક્તિ આવેલી. તેણે મૃત કન્યાનું શરીર ખરીદવા પૈસા આપવાની તૈયારી બતાવેલી. ભૂતિયા શાદી માટે મોટા ભાગે કુંવારા મૃત્યુ પામેલા છોકરા કે છોકરીનું પાર્થિવ વાપરવામાં આવે છે.
પરિવારે આ બાબતે પેલી વ્યક્તિને સ્પષ્ટ ના પાડી દીધી હતી. આ ઘટના પછી થોડાક દિવસ બાદ તેઓ જ્યારે દીકરીની કબર પર પ્રાર્થના કરવા આવ્યા તો કબર ખોદાયેલી હતી અને એમાંથી મૃતદેહ ગાયબ હતો. ચોરી કરનારાઓનો કેટલોક સામાન પણ ખોદાયેલી કબર પાસે પડ્યો હતો. એના આધારે પોલીસ મૃતદેહચોરોની તપાસ કરી રહી છે.