ભારતીય શૂટર સૌરભ ચૌધરીએ શુક્રવારે રાષ્ટ્રીય શૂટિંગ ટ્રાયલ્સમાં પુરુષોની 10 મી એર પિસ્તોલનું ટાઇટલ જીતી લીધું હતું, જો કે આની સાથે જ તેણે બેવડી સફળતા પણ મેળવી હતી, 19 વર્ષના સૌરભે ફાઇનલમાં 246.9ના સ્કોર સાથે વર્લ્ડ રેકોર્ડ બનાવ્યો હતો.
મહિલા કેટેગરીમાં જોડીદાર મનુ ભાકેરે પણ જીત્યું નેશનલ ટાઇટલ
સૌરભે 60 શૉટના ક્વોલિફિકેશન રાઉન્ડમાં 590 નો સ્કોર બનાવ્યો હતો અને ત્યારબાદ 246.9 ના સ્કોર સાથે ફાઇનલમાં તેણે તેના સ્પર્ધકોને પછાડ્યા હતા. તે જ સમયે, અમનપ્રીત સિંઘ 244.5 (580)ના સ્કોર સાથે બીજા અને શિવ નરવાલ 223.3 (579)ના સ્કોર સાથે ત્રીજા સ્થાને આવ્યા હતા. મહત્વનું છે કે આની પહેલા ફાઇનલનો વિશ્વ રેકોર્ડ 246.5 પોઇન્ટ હતો, જે ઉત્તર કોરિયાના કિમ સોંગ ગુકના નામે નોંધાયેલો છે.
મહિલા કેટેગરીમાં મનુ ભાકેર પ્રથમ સ્થાન પર
આ બધાની દરમિયાન, 10 મી એર પિસ્તોલ શૂટિંગ ટ્રાયલ્સની મહિલા કેટેગરીમાં મનુ ભાકેરે પ્રથમ સ્થાન મેળવ્યું હતું. મનુએ ક્વોલિફાઇંગ રાઉન્ડમાં 580 પોઇન્ટ મેળવ્યા હતા અને તે ટોપ પર છે. તે પછી તેણે 239.3 પોઇન્ટ મેળવીને ફાઈનલ પોતાને નામ કરી હતી. તે જ સમયે, તમિળનાડુની શ્રી નિવેતા 238.2 (572) પોઇન્ટ્સના સ્કોર સાથે બીજા અને ઉત્તર પ્રદેશની નેહા 217.4 (571) પોઇન્ટ્સના સ્કોર સાથે ત્રીજા સ્થાને રહી હતી.
મહત્વનું છે કે હરિયાણાની મનુ ભાકેર અને યુપીના સૌરભ ચૌધરી ની શૂટિંગમાં જોડી છે અને આ બંને નિશાનેબાજ ભારત માટે મિક્સ્ડ ટીમ ગોલ્ડ મેડલ ચાર વાર જીતી ચૂકયા છે, નવી દિલ્હી, બીજિંગ, મ્યુનિક અને રિયો ડે જેનેરિયોમાં તેમણે આ સફળતા મેળવી છે. નોંધનિય છે કે ભારત માટે તેઓ આ અગાઉ ટોક્યો ઓલિમ્પિક 2020નો ક્વોટા અગાઉથી જ બુક કરી ચૂકયા છે, જો કે કોરોના મહામારીને લઈને હજુ સુધી જાપાનની રાજધાનીમાં પ્રસ્તાવિત ટોક્યો ઓલિમ્પિક યોજાઇ નથી, અને હજુ પણ ક્યારે યોજાશે તેના વિશેની ચર્ચાઓ ચાલી રહી છે.