સંવેદનહીન / ભૂખે ભણતર ના થાય ગોપાલા : ઠાસરાની પ્રાથમિક શાળાના બાળકો ફૂડ સિક્યુરીટી એલાઉન્સની હજુ પણ રાહમાં

• ખેડા જિલ્લા પ્રાથમિક.શિક્ષણ વિભાગની બેદરકારી
• સરકારના આદેશોને ઘોળીને પી જતી શાળાઓ
• બાળકોને નથી ચુકવાયું ફૂડ સિક્યુરિટી એલાઉન્સ

ગુજરાતમાં કોરોના સંક્રમણ ઘટતા જ હવે પ્રાથમિક શાળાઓ શરુ કરવાની હિલચાલ ચાલી રહી છે ત્યારે, ખેડા જિલ્લાના પ્રાથમિક શિક્ષણ વિભાગની ઘોર બેદરકારી સામે આવી છે. ઠાસરાની શાળાના 136 બાળકોને ફૂડ સિક્યુરીટી એલાઉન્સથી હજુ સુધી વંચિત રખાયા છે.

બાળકો પ્રત્યે બેદરકારી ?

પ્રાથમિક શાળાકીય બાળકો શાળાને તીર્થભૂમિ અને જ્ઞાનની ગંગા માનીને શાળાએ આવતા હોય છે. ત્યારે, ખેડા જિલ્લા પ્રાથમિક વિભાગ બાળકોના ફૂડ સિક્યુરીટી એલાઉન્સ ચુકવવામાં 'ચાંચુડી ઘડાવે છે'.ઠાસરાનો પ્રાથમિક શિક્ષણ વિભાગ સરકારના આદેશોને ઘોળીને પી ગયો હોવાની પ્રતીતિ એ વાત પરથી થાય છે કે, 10 તબક્કામાં ચૂક્વાનારું ફૂડ સિક્યુરીટી એલાઉન્સ હજુ સુધી  બાળકોને ચૂકવાયું નથી. આ મુદ્દે ઠાસરાના મામલતદાર અને સ્થાનિક શિક્ષણ વિભાગની લાપરવાહી કે બેદરકારી અંગે બૂમ ઉઠી છે.

ઉચ્ચસ્તરે થશે રજૂઆત

સરકારે આપેલા આદેશ મુજબ શાળાના બાળકોને ફૂડ સિક્યુરીટી એલાઉન્સ તત્કાલ ચૂકવી દેવા અંગે આદેશ કરાયો હતો. પરંતુ,ખેડા જિલ્લા પ્રાથમિક શિક્ષણ વિભાગ આવા આદેશને અવગણીને એલાઉન્સ નથી ચૂકવી રહ્યો. આ અંગે ઉચ્ચસ્તરે રજૂઆત કરવાની પણ હિલચાલ ચાલી રહી છે.