બિઝનેસ / એક સમાચાર આવ્યા અને આ કંપનીની માર્કેટ કેપ ઉછળીને 10 લાખ કરોડ વટાવી ગઈ

મુકેશ અંબાણીની રિલાયન્સ ઇન્ડસ્ટ્રીઝ પછી TCS બીજી ભારતીય કંપની બની છે, જેનું માર્કેટ શેર 10 લાખ કરોડને પાર કરી ગયું છે.

આ વર્ષે TCS શેરમાં આ સૌથી મોટો વધારો

કંપનીને લગતા એક સમાચાર પછી સોમવારે TCSના શેરમાં મોટો ઉછાળો જોવા મળ્યો. શેર્સ આશરે 8 ટકા જેટલા વધ્યા હતા. કંપનીના એક શેરની કિંમત તેની સૌથી અધિકતમ કિંમત 2720 રૂપિયા સુધી પહોંચી ગઈ છે. આ વર્ષે TCS શેરમાં આ સૌથી મોટો વધારો છે.

ગુરુવારે TCSનો શેર 2522.75 રૂપિયા પર બંધ થયો હતો અને તેનું માર્કેટ કેપિટલાઇઝેશન 9,46,528 કરોડ રૂપિયા હતું. આજે બજાર ખુલતા જ TCSની માર્કેટ કેપ 10.05 લાખ કરોડ રૂપિયા પર પહોંચી ગઈ છે. TCSના શેર આ વર્ષે લગભગ 25% વધ્યા છે.

TCS બોર્ડ આ અઠવાડિયે મિટિંગ કરવા જઈ રહ્યું છે

TCS બોર્ડ આ અઠવાડિયે મિટિંગ કરવા જઈ રહ્યું છે જેમાં કંપની શેર બાયબેક અંગે નિર્ણય લઈ શકે છે. આ સમાચાર પછી સોમવારે TCSના શેરમાં જોરદાર ઉછાળો જોવા મળી રહ્યો છે. આટલું જ નહીં TCSનો બીજ ક્વાર્ટર (જુલાઈ-સપ્ટેમ્બર)નો રિપોર્ટ આ અઠવાડિયે બહાર આવી રહ્યો છે.

IT કંપનીઓ કોરોના સંકટમાં ઓછી અસર પામી છે.

અગાઉ TCS બોર્ડે વર્ષ 2018માં 16,000 કરોડ શેર બાયબેક કર્યા હતા. હવે ફરી એકવાર બાયબેક થવાના સમાચારથી TCSના શેરમાં રોનક આવી ગઈ છે. આમ પણ IT કંપનીઓ કોરોના સંકટમાં ઓછી અસર પામી છે. આ ક્વાર્ટરમાં મોટા નફાની અપેક્ષા રાખવામાં આવી રહી છે.

નોંધનીય છે કે હાલના સમયમાં રિલાયન્સ ઇન્ડસ્ટ્રીઝની માર્કેટ કેપ 15 લાખ કરોડ છે. ગયા વર્ષે નવેમ્બરમાં રિલાયન્સનું માર્કેટ કેપ 10 લાખ કરોડને પાર પહોંચ્યું હતું. કોરોના સંકટ વચ્ચે પણ રિલાયન્સના માર્કેટ કેપમાં મોટો ઉછાળો થયો છે.