મૉસ્કો ફૉર્મેટ મીટિંગ / અફઘાનિસ્તાનમાં સત્તા મેળવ્યા બાદ તાલિબાને ભારતને લઇને પ્રથમ વખત કર્યો મોટો દાવો

• અફઘાનિસ્તાનના ફંડ ફ્રીઝ થઇ જતા બન્યું કંગાળ
• અફઘાનિસ્તાનને લઇને રશિયાએ યોજી બેઠક
• ભારત અફઘાનિસ્તાનના લોકોને માનવીય સહાયતા માટે તૈયાર!

અફઘાનિસ્તાનમાં સત્તા મેળવ્યા બાદ એવું પહેલીવાર બન્યું છે જ્યારે રશિયા આ મીટિંગનું આયોજન કરી રહ્યું છે અને તાલિબાનના અફઘાનિસ્તાનમાં નિયંત્રણ બાદ આ પહેલીવાર છે જ્યારે ભારતીય પ્રતિનિધિમંડળ અને તાલિબાનના અધિકારી એક બીજાની આમને-સામને આવ્યા છે. મહત્વનું છે કે, મૉસ્કો ફૉર્મેટ મીટિંગમાં સામેલ થવા માટે અમેરિકા, ચીન, ભારત, ઈરાન અને પાકિસ્તાન સહિત 10 દેશોને આમંત્રણ મોકલવામાં આવ્યું હતું.

ભારત અફઘાનિસ્તાનના લોકોને માનવીય સહાયતા માટે તૈયાર!

આ મીટિંગ દરમિયાન ભારતના પ્રતિનિધિમંડળે મોટો નિર્ણય લેતા અફઘાનિસ્તાનને મદદ પહોંચાડવાનો નિર્ણય કર્યો છે. તાલિબાનના સત્તાવાર પ્રવક્તા જબીહુલ્લાહ મુઝાહિદે પોતાના ટ્વિટમાં આ વાત સ્પષ્ટ કરી છે કે ભારત અફઘાનિસ્તાનની મદદ માટે તૈયાર છે. તેમણે પોતાના ટ્વિટમાં લખ્યું કે મૉસ્કોમાં થયેલી બેઠકમાં ભારતીય અધિકારીએ કહ્યું છે કે, અફઘાનિસ્તાનના લોકોને માનવીય સહાયતાની જરૂર છે, અફઘાનિસ્તાન મુશ્કેલ પરિસ્થિતિમાંથી પસાર થઇ રહ્યું છે. ભારત અફગાનિસ્તાનને માનવીય સહાયતા આપવા માટે તૈયાર છે, હજુ સુધી ભારત તરફથી કોઈ સત્તાવાર નિવેદન નથી આપવામાં આવ્યું.

په مسکو فارمټ ناسته کې د هند استازي و ویل، چې د افغانستان خلکو سره بشري مرستې پکار دي، افغانستان له سخت وضعيت څخه تېرېږي. هند چمتو دی چې افغانستان ته بشري مرستې ورکړي.

— Zabihullah (..ذبـــــیح الله م ) (@Zabehulah_M33) October 20, 2021

અફઘાનિસ્તાન પર આર્થિક સંકટ અને ભૂખમરાનો ખતરો

અફઘાનિસ્તાનની ન્યૂઝ વેબસાઇટ ટોલો ન્યૂઝના અનુસાર, આ મીટિંગથી તાલિબાનને ઘણી આશા છે. અફઘાનિસ્તાનના ફંડ ફ્રીઝ થઇ ગયા બાદથી આ દેશ પર આર્થિક સંકટ અને ભૂખમરાનો ખતરો મંડરાય રહ્યો છે. કારણ કે તાલિબાને પોતાની સમાવિષ્ટ સરકારથી જોડાયેલા વચનો નથી નિભાવ્યા, તેવામાં રશિયા તાલિબાનને આંતરરાષ્ટ્રીય માન્યતા આપવાની ઉતાવળમાં નથી.

અમેરિકાએ તાલિબાન સાથે અગાઉ કરી હતી વાતચીત

ઉલ્લેખનીય છે કે, આ મીટિંગ માટે અમેરિકાને પણ આમંત્રણ આપવામાં આવ્યું હતું, પરંતુ અમેરિકાએ આ બેઠક પહેલા જ દોહામાં તાલિબાનના પ્રતિનિધિમંડળ સાથે વાતચીત કરી છે અને આ બેઠકમાં સામેલ નથી થઇ રહ્યા.

તઝાકિસ્તાન અને ઉઝ્બેકિસ્તાને પણ તાલિબાન સરકારને ચિંતામાં

રશિયા સિવાય તઝાકિસ્તાન અને ઉઝ્બેકિસ્તાને પણ તાલિબાન સરકારને લઇને ચિંતા વ્યક્ત કરી છે. તેમણે કહ્યું કે, જે વચન તાલિબાન સરકારે સત્તાવાર રીતે જાહેર કર્યા છે તેને પૂરા કરવામાં નથી આવ્યા. ત્યારે કતર પણ તાલિબાનને કહી ચૂક્યું છે કે તેમને જો ઇસ્લામિક સરકાર ચલાવવી છે તો કતરથી શિખવું જોઇએ. આ સિવાય કેટલાક મુસ્લિમ દેશ તાલિબાનમાં વિદેશ મંત્રીઓને મોકલીને તેમની સમાવિષ્ટ સરકાર ચલાવવા અને સમાજમાં મહિલાઓની ભૂમિકાના મહત્વ માટે પણ અફઘાનિસ્તાન પહોંચવાનો પ્લાન કરી રહ્યા છે.

પાકિસ્તાન મદદ કરી રહ્યું છે, પણ પોતાના દેશને ચલાવવાના છે ફાંફાં

પાકિસ્તાન તાલિબાનને સપોર્ટ કરી રહ્યું છે અને અફઘાનિસ્તાનની ખરાબ પરિસ્થિતિ વચ્ચે દેશને મદદ પણ પહોંચાડી રહ્યું છે પરંતુ પાકિસ્તાનની પણ પોતાની મર્યાદા છે, કારણ કે પાકિસ્તાન ખુદ આર્થિક સંકટ સામે જજૂમી રહ્યું છે. ચીને પણ હજુ સુધી તાલિબાનને લઇને ખુબ ઉત્સાહભર્યું વલણ નથી દર્શાવ્યું. તેવામાં તાલિબાન સતત પ્રયત્ન કરી રહ્યું છે કે તેને જેટલી વધુ થઇ શકે એટલી મદદ મળી શકે.