ક્રિકેટ / સૂર્યકુમાર યાદવ કે હાર્દિક પંડ્યા, T20 વર્લ્ડકપમાં કોણ હશે સૌથી મોટા ગેમચેન્જર ?

• ટી-20 વર્લ્ડ કપ 2022 માટે ભારતીય ટીમ સજ્જ
• હાર્દિક પંડ્યા અને સુર્યકુમાર યાદવ પર લોકોની નજર 
• બન્ને ખેલાડીઓ મોટી પારી રમે તેવી શક્યતાઓ 

ટી-20 વર્લ્ડ કપ 2022માં ભારતની રણનીતિ શું હશે તે અંગે સતત ચર્ચા ચાલી રહી છે. ટીમ ઈન્ડિયાએ હાલમાં જ પોતાની ટીમની જાહેરાત કરી છે, 15 ખેલાડીઓની ટીમમાં ઘણા દિગ્ગજોનો સમાવેશ કરવામાં આવ્યો છે. પરંતુ કેટલાક ખેલાડીઓ એવા પણ છે જે એકલા હાથે રમત અને ટુર્નામેન્ટને સંપૂર્ણપણે ભારતની તરફેણમાં ફેરવી શકે છે. ઘણા દિગ્ગજોએ પણ આ વાતનો ઉલ્લેખ કર્યો છે, આવા ખેલાડીઓમાં બે ખેલાડીઓનું નામ સૌથી ઉપર આવે છે. 

આ બન્ને ખેલાડી મેચ બદલી શકે છે
360 ડિગ્રીના નામથી જાણીતા સૂર્યકુમાર યાદવ અને સ્ટાર ઓલરાઉન્ડર હાર્દિક પંડ્યાનો સમાવેશ થાય છે. છેલ્લા કેટલાક સમયથી આ બંને ખેલાડીઓ ટીમ ઈન્ડિયા માટે કમાલ કરી રહ્યા છે, સૂર્યકુમારે ટી-20માં પણ સદી ફટકારી છે, જ્યારે હાર્દિક પંડ્યાએ જ્યારથી પુનરાગમન કર્યું છે ત્યારથી તેનું પ્રભુત્વ બની રહ્યું છે. આવી સ્થિતિમાં જ્યારે ભારત ઓસ્ટ્રેલિયામાં ટી-20 વર્લ્ડ કપ હાંસલ કરવા માટે રમત રમશે, ત્યારે કોનું બેટ ચાલશે તેના પર સૌની નજર છે.

સૂર્યકુમાર યાદવ
આઇપીએલમાં મુંબઇ ઇન્ડિયન્સ માટે ધૂમ મચાવનારા સૂર્યકુમાર યાદવે ટી-20 ઇન્ટરનેશનલમાં મોડેથી ડેબ્યૂ કર્યું હતું. પણ જ્યારથી તે ભારતીય જર્સીમાં આવ્યો છે, ત્યારથી તેનો દબદબો રહ્યો છે અને ટી-20 ઈન્ટરનેશનલમાં તે ભારતનો શ્રેષ્ઠ દેખાવ કરનાર ખેલાડી તરીકે ઉભરી આવ્યો છે. નંબર-3 હોય કે નંબર-4 સૂર્યકુમાર યાદવ ક્રિઝ પર આવતાની સાથે જ કેટલાક બોલમાં મેચ પલ્ટી નાંખવાની ક્ષમતા ધરાવે છે, જેમ કે તેણે ઘણી વખત બતાવ્યું છે.

મોટી હિટિંગ ક્ષમતા
ટી-20 ઈન્ટરનેશનલમાં સૂર્યકુમાર યાદવ અત્યાર સુધી 28 મેચ રમી ચૂક્યો છે, જેમાં તેના નામે લગભગ 37ની એવરેજથી 811 રન નોંધાયેલા છે. સૂર્યાએ અત્યાર સુધીમાં 6 અડધી સદી અને 1 સદી ફટકારી છે. એટલી જ મેચોમાં સૂર્યકુમારે 45 છગ્ગા અને 76 ચોગ્ગા ફટકાર્યા છે, જે તેની મોટી હિટિંગ ક્ષમતા દર્શાવે છે, તેમજ 173.29નો સ્ટ્રાઇક રેટ પણ વિરોધીઓ માટે એકદમ જોખમી બની રહેવાનો છે. 

મોટા સ્ટેડિયમમાં મોટા શોટ મારી શકે છે
ઓસ્ટ્રેલિયાના પૂર્વ કેપ્ટન રિકી પોન્ટિંગે પણ સ્વીકાર્યું છે કે, સૂર્યકુમાર યાદવ ટી-20 વર્લ્ડ કપમાં ભારત માટે મોટી ગેમ ચેન્જર સાબિત થશે. ઓસ્ટ્રેલિયામાં જ્યાં મોટા-મોટા સ્ટેડિયમ છે ત્યાં સૂર્યકુમાર યાદવના 360 ડિગ્રીના શોટ્સ જરૂર કામ કરશે અને તેનો આત્મવિશ્વાસ પણ જોશમાં આવી જશે. 2022માં જ તેણે 17 મેચમાં 567 રન બનાવ્યા છે, આ વર્ષે તેના નામે 3 અર્ધસદી અને 1 સદી છે. 

હાર્દિક પંડ્યા
ટી-20 વર્લ્ડ કપ 2021માં હાર્દિક પંડ્યા એક વિલન તરીકે સામે આવ્યો હતો, કારણ કે તે બોલિંગ નહોતો કરી શક્યો અને ઘણા ચાહકો, નિષ્ણાતોએ તેને ટીમ ઇન્ડિયાની મોટી કમી ગણાવી હતી. પરંતુ હવે ટી-20 વર્લ્ડ કપ 2022 આવી ગયો છે અને ઘણું થઇ ચુક્યું છે. આ દરમિયાન હાર્દિક પંડ્યાએ પોતાની કેપ્ટન્સીમાં ગુજરાત ટાઇટન્સ માટે આઇપીએલ જીતી હતી, તે ટીમ ઇન્ડિયાનો કેપ્ટન પણ બન્યો હતો.

વાપસી પછી ફોર્મમાં આવ્યો
હાર્દિક પંડ્યાએ આ દરમિયાન સતત રનોનો વરસાદ કર્યો છે. તાજેતરમાં જ સમાપ્ત થયેલા એશિયા કપમાં તે પાકિસ્તાન સામે મેચ વિનર તરીકે પણ ઉભરી આવ્યો હતો, આવી સ્થિતિમાં હાર્દિક પંડ્યાનું મોટી મેચોમાં પ્રદર્શન ટી-20 વર્લ્ડકપમાં ટીમ ઇન્ડિયા માટે વરદાન સાબિત થઇ શકે છે. ટી-20માં હાર્દિક પંડ્યાના નામે 70 મેચમાં 840 રન છે, પરંતુ લગભગ 150ની સ્ટ્રાઇક રેટ હાર્દિક પંડ્યાની અસલી તાકાત છે.

બેટિંગ સાથે બોલિંગ પણ પાવરફુલ
હાર્દિકે જ્યારથી વાપસી કરી છે ત્યારથી સૌથી મોટું બોનસ તેની બોલિંગ છે. હાર્દિક હવે ટી-20 મેચમાં 4 ઓવર ફેંકવામાં સક્ષમ છે, કેટલીક મેચોમાં તેનો ચોથા પેસર તરીકે પણ ઉપયોગ કરવામાં આવ્યો હતો. આ સાથે જ ઓસ્ટ્રેલિયામાં ચાર પણ નહીં તો મધ્યમાં બે ઓવર લેવામાં તે ખૂબ જ અસરકારક સાબિત થઈ શકે છે કારણ કે તે આ ક્ષણે ખૂબ જ ઝડપથી બોલિંગ કરી શકે છે.

ભારતીય ટીમ
રોહિત શર્મા (કેપ્ટન), કેએલ રાહુલ (વાઇસ કેપ્ટન), વિરાટ કોહલી, સૂર્યકુમાર યાદવ, દીપક હૂડા, રિષભ પંત (વિકેટકીપર), દિનેશ કાર્તિક (વિકેટકીપર), હાર્દિક પંડ્યા, આર અશ્વિન, યુઝવેન્દ્ર ચહલ, અક્ષર પટેલ, જસપ્રિત બુમરાહ, ભુવનેશ્વર કુમાર, હર્ષલ પટેલ, અર્શદીપ સિંહ

સ્ટેન્ડબાય : મોહમ્મદ શમી, શ્રેયસ અય્યર, રવિ બિશ્નોઇ અને દીપક ચહર.