સુરત પંથકમાં ધમધમતી બાયોડીઝલની મીલ પર પોલીસે દરોડો પાડી કરોડો રૂપિયાનો મુદામાલ જપ્ત કર્યો છે.
સુરતમાં બાયોડીઝલ બનાવવાનું નેટવર્ક ઝડપાયું
10 મહિના પહેલા મળી આવ્યો હતો જથ્થો
કુલ 1 કરોડ 77 લાખથી વધુનો મુદ્દામાલ જપ્ત
રાજ્યમાં બાયોડીઝલના વધતાં દૂષણ વચ્ચે સુરતની માંડવી પોલીસને સૌથી મોટી સફળતા મળી છે. પોલીસે દરોડો પાડી મસમોટું પ્રતિબંધિત બાયોડીઝલ નેટવર્ક ઝડપી પાડ્યું છે. સુરત ગ્રામ્યનાં માંડવીના તાલુકાના કરંજ GIDCમાં પોલીસે દરોડો પાડી બાયોડીઝલ બનાવતી મીલ ઝડપી પાડી છે. માંડવી પોલીસે રેડ કરી 2 ટેન્કર અને હજારો લીટર બાયોડીઝલ, પ્રવાહી અને અન્ય સામાન મળી કુલ રૂપિયા 1.77 કરોડથી વધુનો મુદ્દામાલ જપ્ત કરવામાં આવ્યો હતો.
સુરત પંથક જાણે બાયોડીઝલનું 'ઘર'
પોલીસની પ્રાથમિક તપાસમાં વિવિધ કેમિકલ અને અન્ય પ્રવાહીઓનું મિશ્રણ ઉમેરીને આ બાયોડીઝલ બનાવવામા આવતું હોવાનું ભોપાળુ છતું થયું છે. મહત્વનુ છે કે, આશરે 10 મહિના પહેલા સ્ટેટ વિજિલન્સની ટીમે આજ વિસ્તારમાંથી બાયોડીઝલનું સૌથી મોટું નેટવર્ક ઝડપી પાડ્યું હતું. ત્યારે ફરી વખત આ પ્રતિબંધિત બાયોડીઝલ બનાવવાનું નેટવર્ક ઝડપાતા અનેક સવાલો ઉભા થયા છે અને સુરત જાણે બાયોડીઝલનું 'ઘર' બની રહ્યું હોય તેવી સ્થિતિ વર્તાઇ છે. આ પ્રકરણમાં ફેક્ટરીનો મુખ્ય માલિક ઇકબાલ ઉર્ફે અસ્મલ તૈલી ફરાર છે જેને વોન્ટેડ જાહેર કરવામાં આવ્યો છે ત્યારે પોલીસે વોન્ટેડ આરોપીના પુત્ર અમીન અસ્લમ તૈલી સહિત કુલ 3 વિરુદ્ધ ગુન્હો નોંધી કાર્યવાહી હાથ ધરી છે.
પોલીસે 3 શખ્સોને ઝડપી કાર્યવાહી હાથ ધરી
માંડવી પોલીસે બાતમીના આધારે ગત મોડી રાત્રે કરંજ જીઆઈડીસીમાં દરોડા પાડ્યા હતા. મિલમાં ઓઈલ બનાવવાના નામ પર બાયોડીઝલનો કાળો કારોબાર ધમધમી રહ્યો હતો. આ જગ્યા પરથી 10 મહિના પહેલાં સ્ટેટ વિજીલન્સની ટીમે બાયોડીઝનો જંગી જથ્થો ઝડપી પાડ્યો હતો. ફરીથી એ જગ્યા પર બાયોડીઝલનો વેપલો શરુ કરી દેવામાં આવ્યો હતો. જેને પગલે પોલીસે વોન્ટેડ આરોપીના પુત્ર અમીન અસ્લમ તૈલી સહિત કુલ 3 શખ્સોને ઝડપી પાડી આગળની વધુ તપાસ હાથ ધરી છે. મહત્વનું છે, કે આવા તત્વોને જાણે કાયદાનો ડર જ ના હોય તેમ બેફામ બન્યાં હોવાથી લોકોમાં પોલીસની કામગીરી સામે પણ શંકાની સોય તણાય છે.
10 મહિના પહેલા મળી આવ્યો હતો જથ્થો
ગત ઓગસ્ટ માસમાં સુરતમાં સ્ટેટ મોનીટરીંગ સેલ દ્વારા ગેરકાયદે બાયોડીઝલના વેચાણનો પર્દાફાશ કરવામાં આવ્યો હતો. આ મામલે ચોંકાવનારી વિગતો સામે આવી હતી. જે-તે સમયે પોલીસે બાયોડીઝલ, વાહનો અને રોકડ સહિત 6.90 કરોડનો મુદ્દામાલ કબજે કરી 7 આરોપીની ધરપકડ કરી હતી. પોલીસ તપાસમાં આરોપી અસલમ સુરત ગ્રામ્ય વિસ્તારમાં કરંજ પાસે ખોટી રીતે લાઇસન્સ મેળવી બાયોડીઝલ બનાવતો હતો અને હરતા ફરતા પેટ્રોલ પંપ રાખતો હોવાનું પણ સામે આવ્યું હતું.