રાજ્યમાં સબ સલામતના બણગા પોકારતી સરકારના દાવા પોકળ જોવા મળી રહ્યાં છે. રાજ્યમાં હજુ તો શિયાળાની શરૂઆત થઇ રહી છે ત્યાં જ સુરતમાં સતત ત્રણ દિવસથી કીમ વિસ્તારમાં ચોરીની ઘટનાઓ સામે આવી રહી છે. જેને લઇને સુરત પોલીસ પર પણ સવાલ થઇ રહ્યાં છે. શિયાળામાં ઠંડીનું આગમન થવાની સાથે જ જાણે રાજ્યભરમાં તસ્કરો સક્રિય થઇ ગયા હોય તેવું જોવા મળી રહ્યું છે.
સુરતના કીમ વિસ્તારમાં સતત ત્રીજા દિવસે ચોરી
બંધ મકાનને ટાર્ગેટ કરે છે ચોરની ટોળકી
4 જેટલા ચડ્ડી બુકાની ધારી CCTVમાં કેદ
સુરતના કીમ વિસ્તારમા આજે ફરી એક વખત ચોરીની ઘટના સામે આવી છે. શહેરના કીમ વિસ્તારમાં આજે સતત ત્રીજા દિવસે તસ્કરોનો તરખાટ જોવા મળ્યો છે. જેમાં ચોરોએ બંધ મકાનમાંથી ચોરી કરી છે.
શહેરમાં સતત ત્રીજા દિવસે કિમ વિસ્તારમાં ચોરીની ઘટના બનતા પોલીસ પર પણ સવાલ ઉભાથઇ રહ્યાં છે. કિમ વિસ્તારના આ બંધ મકાનમાંથી ચોરી કરીને ચોર ફરાર થઇ ગયા હતા.
જો કે ચોરીનો સામાન લઈને જતા ચોર CCTV કેમેરામાં કેદ થયા હતા. CCTV કેમેરામાં 4 જેટલા ચડ્ડી બુકાનીધારી કેદ થયા હતા. આમ સતત ત્રણ દિવસ એક જ વિસ્તારમાંથી ચોરી થતા અનેક સવાલ થયા છે.
આમ હજુ તો શિયાળાની શરૂઆતમાં ઠંડીના ઓછા પ્રમાણમાં પોલીસકર્મીઓ રાત્રે માત્ર ઉંઘમાં જ હોય તેવુ લાગી રહ્યુ છે અને ચોર બંધ મકાનને ટાર્ગેટ કરીને નિકળી જાય છે.
ઉલ્લેખનીય છે કે ગઇકાલે કઠોદરા ગામમાં શિવસાઇ સોસાટીમાંથી બે મકાનમાં ચોરીની ઘટના સામે આવી હતી. જેમાં એક ઘરમાંથી રોકડ અને બીજા ઘરમાં સામાન લઇને તસ્કરો ફરાર થયા હતા. જો કે સતત થઇ રહેલી ચોરીની ઘટનાથી લોકોમાં ભયનો માહોલ જોવા મળી રહ્યો છે.