સુરતનાં જિલ્લાની એક સરકારી પ્રાથમિક શાળાનાં પ્રિન્સિપાલે કરી એક અનોખી પહેલ. બાળકોને ઘડિયા યાદ રહે તે માટે બનાવ્યો ઘડિયા ગરબો. આ ઘડિયા ગરબો ગાઇને બાળકો મજાની સાથે સાથે ઘડિયા પણ પાકા કરે છે. જેનાં કારણે બાળકોને ઘડિયા ફટાફટ યાદ રહી જાય છે.
અહીં ત્રણ તાલી પર ઘડિયા ગરબા રમાય છે
બાળકો ગરબો ગાઇને ગામની શાળાનું વર્ણન કરે છે
બાળકોને ઘડિયા લાંબા સમય સુધી યાદ રખાવવા આ પ્રયોગ કરાયો
ઘણી પ્રાથમિક શાળામાં બાળકોને સરળતાથી યાદ રહી જાય તે માટે બાળકોને ડિજિટલ ક્લાસરુમ કે એનિમેશન ફિલ્મો દ્વારા શિક્ષણ આપવામાં આવે છે. તો ક્યાંક બાળકોને ભણાવવા અવનવી તરકીબ અપનાવવામાં આવે છે. ત્યારે અનેક વાર લખવા છતાં યાદ ન રહે તેવા ઘડિયા અને કવિતાઓને યાદ રાખવા ઓલપાડ તાલુકાની એક ગામમાં નવરાસ્ત્રીને ધ્યાનમાં લઇને એક પ્રયોગ કરવામાં આવ્યો છે. શું છે આ પ્રયોગ...
શું છે આ ઘડિયા ગરબા ?
ઓલપાડ તાલુકાનાં ગોથણ ગામની ધો-1થી 5ની બંગર પ્રાથમિક શાળામાં હળપતી વર્ગનાં 41 બાળકો અભ્યાસ કરે છે. અહીં પ્રિન્સીપલે બાળકો ઝડપથી યાદ કરી શકે તે માટે ઘડિયાને ગરબાનાં રાગમાં ઢાળ્યાં છે. આ ઘડિયા તેઓ બાળકો સાથે ગાઇ અને ગરબાને ત્રણ તાલીમાં રમાડીને યાદ કરાવે છે. જેના કારણે બાળકોને ઘડિયા યાદ પણ રહી જાય છે. અહીંની શાળામાં બાળકોને ઘડિયા યાદ કરાવવાં 10 વખત લખી લાવવાનું હોમ નથી અપાતું, પણ ગરબાનાં રાગમાં ઘડિયા ગરબા ગવાય છે અને રમાય છે.
કેમ ઘડિયા ગરબા રમાય છે?
અહીં ભણવાં આવતાં બાળકોને ઝડપથી યાદ નથી રહેતું. બીજું કે ઘડિયા યાદ રાખવાં બધાં બાળક માટે સહેલાં નથી હોતા. ઘણાં બાળકો ઘડિયા યાદ કરીને પણ ભૂલી જતાં હોય છે. જેનાં કારણે આ શાળાનાં પ્રિન્સિપાલ ભરતભાઇ એસ. પ્રજાપતિને વિચાર આવ્યો કે નવરાત્રીમાં બાળકો ડી.જેમાં વાગતાં ગરબા ઝડપથી યાદ કરી લેતાં હોય છે. તો કેમ નહી ઘડિયાનો ગરબો બનાવીએ. આ જ વિચારને તેઓએ આ નવરાત્રીમાં અમલમાં મુક્યો જેથી બાળકો ઘડિયા લાંબા સમય સુધી યાદ રાખી શકે.
દરેક કાવ્યો અને ગીતો પર બનશે ગરબો
આ અંગે વાત કરતા શાળાનાં પ્રિન્સિપલ ભરતભાઇ એસ. પ્રજાપતિ કહે છે કે, બાળકોને ઝડપથી યાદ રહે તે માટે અમે વિચાર્યું કે નવરાત્રીનો માહોલ છે તો બાળકો પર ઘડિયા ગરબાની અસર થશે. જેથી ઘડિયા ગરબા બનાવ્યાં. બીજું કે ગામની શાળાનું વર્ણન કરતો ગરબો બનાવ્યો છે. જેથી બાળકોને શાળા સાથે આત્મિયતા વધે. આનાથી અમને ફાયદો પણ થયો છે. હવે અમે વિચારી રહ્યાં છીએ કે પ્રાથમિક શાળાનાં બાળકોને ગુજરાતી અને પર્યાવરણનાં વિષયમાં આવતાં કાવ્યો અને ગીતોને ગરબાની સ્ટાઇલમાં ભણાવાય તો તે સરળતાંથી યાદ રાખી શકશે. જેથી અમે ભવિષ્યમાં તે દિશામાં કામ કરી રહ્યાં છીએ.