ધરપકડ / સુરતમાં બે બાઇક ચોરીને જ્વેલર્સ લૂંટવાનો રત્નકલાકારોએ પ્રયાસ કર્યો, જીવના જોખમે આવી રીતે માલિકે બચાવી લીધી દુકાન

• સુરતમાં એક જ્વેલર્સમાં લૂંટનો નિષ્ફળ પ્રયાસ
• નિતિનભાઈએ બુમાબૂમ કરતા આરોપી ત્યાંથી પલાયન થઇ ગયા
• ક્રાઇમ બ્રાન્ચની ટીમે ગણતરીના દિવસો આરોપીને પકડી પાડ્યા

રૂપિયાની જરૂરિયાત હોવાથી લૂંટનો પ્લાન કર્યો. સુરતમાં રત્નકલાકાર તરીકે કામ કરતો સંદિપે બનાવ્યો પ્લાન હતો. લૂંટ માટે બે બાઇક પણ ચોરી કરી હતી. ચાર દિવસ પહેલા સુરત શહેરના કતારગામ વિસ્તારમાં પ્રસંગ જ્વેલર્સમાં લૂંટના ઇરાદે સંદિપ અને નિકુલ આવ્યા હતા. આ બંને ઇસમો ગ્રાહકનો સ્વાંગ રચી દુકાનમાં ઘૂસ્યા હતા. દુકાનમાં ઘૂસતાની સાથે જ તેમના દ્વારા ચપ્પુની અણીએ લૂંટ કરવાની કોશિષ કરી હતી. લૂંટ કરવા માટે તેમણે દુકાન માલિક નિતીનભાઈ સોની ઉપર જીવલેણ હુમલો કર્યો હતો. નિતિનભાઈ ઉપર હુમલો થયા બાદ તેમણે બુમાબૂમ કરતા આરોપી ત્યાંથી પલાયન થઇ ગયા હતા. પોલીસનો કાફલો તાત્કાલિક ઘટના સ્થળે પહોંચ્યો હતો. તો બીજી તરફ સમગ્ર ઘટનાને લઇ ક્રાઇમ બ્રાન્ચની ટીમ કામે લાગી હતી અને માત્ર 4 દિવસમાં બન્ને આરોપીને ઝડપી પાડી જેલના હવાલે કરી દીધા છે.

લૂંટારૂઓએ બે દિવસ માટે પ્રસંગ જ્વેલર્સની રેકી કરી હતી

રૂપિયાની જરૂરને લઇ સંદીપ સુરેશભાઈ ડુંગરાણી અને નિકુલ ચકુરભાઈ ભીંગરાડિયા લૂંટનો પ્લાન બનાવ્યો. જોકે હવે સંદીપ અને નિકલ નામના બે આરોપીની ક્રાઇમ બ્રાન્ચે ધરપકડ કરી હતી. શું બન્ને રીઢા ગુનેગાર છે કે કેમ તે અંગે તપાસણી કરવા માટે ક્રાઇમ બ્રાન્ચ દ્વારા તે બંનેની આકરી પૂછપરછ કરવામાં આવી હતી. પોલીસે આરોપીઓની પૂછપરછ કરી ત્યારે સમગ્ર મામલો આવ્યો બહાર સંદિપને રૂપિયાની જરૂર હોવાને કારણે સંદિપે નિકુલને ગામથી બોલાવી 15 દિવસ પોતાના ઘરમાં રાખ્યો હતો. તેમણે બે દિવસ માટે પ્રસંગ જ્વેલર્સની રેકી કરી હતી. 

લુંટારૂઓએ ઉપરાછાપરી ચપ્પુના ઘા ઝીંંક્યા હતા તો નિતિનભાઇએ કરી બુમાબૂમ

ત્યારબાદ 2 જાન્યુઆરીના સાંજના સમયે તેઓ જ્વેલર્સની દુકાને પહોંચ્યા હતા. ત્યારે તેમણે નિતિનભાઈને સોનાનું બ્રેસલેટ બતાવવા કહ્યુ હતું. પરંતુ ત્યા બ્રેસલેટ ન હોવાથી તેઓએ અન્ય વસ્તુની ડિમાન્ડ કરી હતી પરંતુ નિતિનભાઇને શક જતાં તેમણે વસ્તુઓ બતાવવાનો ઇન્કાર કરતા નિકુલ દ્વારા ચપ્પુ કાઢી તેમના ઉપર ઉપરાછાપરી ઘા ઝીંકવાનું શરૂ કર્યુ હતું. હુમલો થયા બાદ નિતિનભાઈએ બુમાબૂમ કરતા આરોપી ત્યાંથી પલાયન થઇ ગયા હતા.

પોલીસે બન્ને આરોપીઓને ઝડપી લીધા

પોલીસે આરોપીને સરથાણા વિસ્તારમાંથી ઝડપી પાડ્યા છે. તેમની પાસેથી લૂંટમાં વપરાયેલું ચાકુ, બે બાઇક અને મોબાઇલ ફોન કબજે લીધા હતા. પોલીસે બન્ને આરોપીઓ પાસેથી રાજપીપળાનો એક બાઇક ચોરીનો અને કતારગામનો લૂંટના નિષ્ફળ પ્રયાસ સાથે ખૂનની કોશીષનો ગુનો ડિટેક્ટ કર્યો છે.