સગીરાના વક્ષ:સ્થળ(બ્રેસ્ટ) નો સ્કીન ટુ સ્કીન કોન્ટક્ટ (ચામડીનો સ્પર્શ કર્યા વગર) તેના સ્તનના સ્પર્શને જાતિય શોષણ ન ગણી શકાય તેવા બોમ્બે હાઈકોર્ટના ચુકાદા પર સુપ્રીમ કોર્ટે સ્ટે ફરમાવી દીધો છે. બોમ્બે હાઈકોર્ટે આ ગુનાને પોક્સો એક્ટના દાયરામાંથી બહાર ગણાવ્યો હતો.
હાઈકોર્ટે કહ્યું હતું કે સ્કિન ટુ સ્કિન ટચ નહીં તો ગુનો પોક્સો એક્ટના દાયરામાં ન આવે
હાઈકોર્ટના આ વિવાદીત ચુકાદાની વિરૃદ્ધ સુપ્રીમમાં અરજી થઈ હતી
નાગપુરમાં 39 વર્ષીય આધેડે અંધારામાં 12 વર્ષીય સગીરાની છેડતી કરી હતી તથા તેના સ્તનનો સ્પર્શ કર્યો હતો.
એટર્ની જનરલ કેકે વેણુગોપાલે સુપ્રીમમાં એવી રજૂઆત કરી કે 19 જાન્યુઆરીએ બોમ્બે હાઈકોર્ટની નાગપુર ખંડપીઠ દ્વારા અપાયેલ ચુકાદામાં હાઈકોર્ટે 12 વર્ષીય સગીરાની અંધારમાં છેડતી કરનાર આરોપીને નિર્દોષ જાહેર કર્યો હતો. હાઈકોર્ટે આરોપીએ આ આરોપોમાંથી મુક્ત કરીને તેને ફક્ત આઈપીસી સેક્શન 354 હેઠળ ફક્ત 1 વર્ષની સજા ધરાવતી છેડતીના કેસનો દોષી ગણાવ્યો હતો.
ચીફ જસ્ટિસ એસએ બોબડેની આગેવાની વાળી ત્રણ સભ્યોની ખંડપીઠે મહારાષ્ટ્ર સરકાર અને આરોપીને 2 અઠવાડિયામાં જવાબ દાખલ કરવાની નોટીસ પાઠવી છે. બોમ્બે હાઈકોર્ટના ચુકાદા પર સ્ટે મૂકતા ચીફ જસ્ટિસે કહ્યું કે અમે પોસ્કોની કલમ 8 ના સંદર્ભમાં આરોપીના છૂટકારા પર હાલ પૂરતો મનાઈ હુકમ ફરમાવીએ છીએ.
એટર્ની જનરલે ક હ્યું કે બોમ્બે હાઈકોર્ટનો ચુકાદો વિવાદાસ્પદ અને ખેદજનક છે અને તેનાથી સમાજમાં ખરાબ દાખલો બેસવાની સંભાવના છે. તેમણે સુપ્રીમને આ કેસની વિચારણા કરવાની અપીલ કરી. એટર્ની જનરલની રજૂઆત બાદ સુપ્રીમ કોર્ટે તેમને પીટિશન ફાઈલ કરવાની મંજૂરી આપીને આરોપીના છૂટકારા પર સ્ટે મૂકી દીધો હતો.
યૂથ બાર એસોસિએશન દ્વારા બોમ્બે હાઈકોર્ટના આ ચુકાદાની વિરૃદ્ધ સુપ્રીમમાં અરજી દાખલ કરવામાં આવી હતી. બોમ્બે હાઈકોર્ટના આ ચુકાદા પર ખૂબ મોટો વિવાદ થયો હતો. ઘણા નાગરિક સંગઠનો અને જાણીતી હસ્તીઓએ આ ચુકાદાને હાસ્યાપદ ગણાવીને તેની આકરી ટીકા કરી હતી.
સગીરા સાથે શું થયું હતું
નાગપુરમાં 39 વર્ષીય આધેડે અંધારામાં 12 વર્ષીય સગીરાની છેડતી કરી હતી તથા તેના સ્તનનો સ્પર્શ કર્યો હતો. ફેબ્રુઆરી 2020 માં નાગપુરની ટ્રાયલ કોર્ટે પોસ્કોની ધારા 8 હેઠળ તથા આઈપીસીની ધારા 354 હેઠળ આરોપીને 3 વર્ષની સજા ફટકારી હતી. આરોપીએ ટ્રાયલ કોર્ટના ચુકાદાને બોમ્બે હાઈકોર્ટમાં પડકાર્યો હતો. બોમ્બે હાઈકોર્ટની નાગપુર ખંડપીઠે આ ચુકાદો આપતી વખતે કહ્યું હતું કે સગીરાના નિવસ્ત્ર કર્યા વગર, તેના સ્તનનો સ્પર્શ કરવો જાતિય હુમલો ન કહેવાય. જોકે આ ગુનો કરનાર આરોપીની સામે આઈપીસીની ધારા 354 (શીલભંગ) હેઠળ કાર્યવાહી કરી શકાય.