SHORT & SIMPLE / અમદાવાદમાં પણ બોર્ડની પરીક્ષામાં પુરવણીના કારણે પરેશાની: વિદ્યાર્થીઓને 20-20 મિનિટ રાહ જોવી પડતી હોવાનો દાવો

• બોપલની તેજસ વિદ્યાલયના વાલીઓનો આરોપ
• પુરવણી ન આપતા હોવાનો આરોપ
• 20 મિનિટ રાહ જોવી પડતી હોવાનો આરોપ

રાજકોટ બાદ હવે અમદાવાદની સ્કૂલમાં બોર્ડની પરીક્ષા દરમિયાન સુપરવાઈઝર સમયસર પુરવણી ન આપતા હોવાનો આરોપ લગાવવામાં આવ્યો છે. પરીક્ષા કેન્દ્ર પર પુરવણી મોડી આપવામાં આવતા વાલીઓ અને વિદ્યાર્થીઓમાં આક્રોશ જોવા મળી રહ્યો છે. આજે સ્કૂલની બહાર વાલીઓએ એકઠા થઈને સ્કૂલના તંત્ર સામે આક્રોશ વ્યક્ત કર્યો હતો.

20 મિનિટ રાહ જોવી પડતી હોવાનો આરોપ
બોપલની તેજસ વિદ્યાલય પર વાલીઓએ બોર્ડની પરીક્ષામાં સમયસર પુરવણી ન આપતા હોવાનો આરોપ લગાવ્યો છે. કેટલાક વિદ્યાર્થીઓને પુરવણી માટે રાહ જોવી પડે છે. વાલીઓએ પુરવણી માટે 20 મિનિટ રાહ જોવી પડતી હોવાનો આરોપ લગાવ્યો છે. વાલીઓએ જણાવ્યું છે કે, કેટલાક વિદ્યાર્થીઓને પેપર પણ મોડું આપવામાં આવ્યું હતું. જેના કારણે પેપરનો સમય પૂર્ણ થયા બાદ વિદ્યાર્થીઓને ઘણું લખવાનું બાકી રહી ગયું હતું. આપને જણાવી દઈએ કે, ગઈકાલે રાજકોટથી પણ આવો જ બનાવ સામે આવ્યો હતો. 

ભરાડ સ્કૂલની બહાર વાલીઓએ મચાવ્યો હતો હોબાળો
રાજકોટની ભરાડ સ્કૂલમાં ગઈકાલે ધોરણ 10નું ગણિતનું પેપર લેવાય રહ્યું હતું. આ સમયે સપ્લીમેન્ટરી ખુંટી પડતા વિદ્યાર્થીઓને ભોગવવાનો વારો આવ્યો હતો. ત્યારે આ મામલે આક્રોશ સાથે વાલીઓ પણ ભરાડ સ્કૂલ ખાતે પહોંચ્યા હતા અને ત્યાં તંત્ર સામે હોબાળો મચાવ્યો હતો. વિદ્યાર્થીઓએ આક્ષેપ કર્યો હતો કે ગણિતના પેપર બાકી રહી ગયું છે. સપલી 15થી 20 મિનિટ મોડી પહોંચતા 25 જેટલા વિદ્યાર્થીઓને પેપર રહી ગયું. રોષે ભરાયેલા વાલીઓ સ્કૂલ ખાતે પહોંચ્યા હતા અને ઉગ્ર વિરોધ કર્યો હતો. જોકે વાલીઓના રોષને પગલે પોલીસ પણ ભરાડ સ્કૂલ ખાતે પહોંચી હતી.