વડોદરામાં રખડતી ગાયો અને આખલા બાદ હવે રખડતા અશ્વોથી સ્થાનિકો ત્રસ્ત, ભાયલી વિસ્તારમાં જાહેર માર્ગ પર અશ્વોએ અડિંગો જમાવતા વાહનચાલકોને ભારે હાલાકી વેઠવાનો વારો
- વડોદરામાં રખડતા અશ્વોનો ત્રાસ
- જાહેર માર્ગ પર અશ્વોએ અડિંગો જમાવ્યો
- ભાયલી વિસ્તારમાં રખડતા અશ્વોનો વીડિયો વાયરલ
રાજ્યના મોટાભાગના શહેરોમાં રખડતા ઢોરની સમસ્યાએ માઝા મુકી છે. એમાં પણ છેલ્લા એકાદ વર્ષથી તો રસ્તા પર રખડતાં ઢોરનો ત્રાસ ખૂબ જ વધી ગયો છે, જેના પગલે નાગરિકોએ જીવ પણ ગુમાવવાનો વારો આવી રહ્યો છે. જાહેર માર્ગો પર હાલ ઠેર-ઠેર ઢોર અડિંગા મારીને બેસે છે. આવી સમસ્યાઓ અંગે રજૂઆતો અને કાયમી ઉકેલની માંગણી અનેક વખત કરવામાં આવી છે, ત્યારે હવે વડોદરામાં રખડતા અશ્વોએ અડિંગો જમાવ્યો છે. જેના કારણે સ્થાનિક લોકો ત્રસ્ત બન્યા છે.
શહેરના ભાયલી વિસ્તારમાં જાહેર રસ્તાઓ પર રખડતી ગાયો અને આખલા બાદ હવે રખડતા અશ્વોએ અડિંગો જમાવ્યો છે. જેનો વીડિયો સોશિયલ મીડિયા પર વાયરલ થયો છે. જેમાં જોઈ શકાય છે કે ટ્રાફિકથી ધમધમતા રોડની વચ્ચોવચ અશ્વોનું ટોળું ઉભુ છે. જેના કારણે રસ્તા પર ટ્રાફિકજામની સ્થિતિ સર્જાઈ છે. રસ્તામાં વચ્ચોવચ્ચ ઉભેલા અશ્વોએ વાહન ચાલકો માટે પરેશાની સર્જી દીધી છે. આમ રખડતા ઢોરને પકડવામાં નિષ્ફળ પાલિકા સામે હવે અશ્વોને પકડવાનો નવો પડકાર ઉભો થયો છે.
વડોદરામાં રખડતા ઢોરની સમસ્યા દિવસેને દિવસે કૂદકેને ભૂસકે વધી રહી છે. આપને જણાવી દઈએ કે, વડોદરામાં થોડા મહિના અગાઉ શહેરના અલકાપુરી વિસ્તારના જેતલપુર રોડ પાસે ગાયે એક યુવાનને અડફેટે લીધો હતો. ગાયે અડફેટે લેતા યુવાનને ગંભીર ઈજાઓ પહોંચી હતી. તેને મોઢાના ભાગે ઈજાઓ થતાં શહેરની એસએસજી હોસ્પિટલ ખાતે સારવાર માટે ખસેડવામાં આવ્યો હતો.