ગૌરવ / વડોદરાના 13 વર્ષના બાળકે વૈજ્ઞાનિકોને પણ હંફાવ્યા, પ્રજ્ઞાચક્ષુ માટે કર્યા ગજબ સંશોધન

• વડોદરાના 13 વર્ષના બાળકની અનોખી સિદ્ધિ
• ઇન્ટરનેટની મદદથી અભ્યાસ સાથે હાથ ધર્યા સંશોધન
• પ્રજ્ઞાચક્ષુ લોકો માટે કરી અનેક શોધ

ઈલેકટ્રીક અને રોબોટિક ઉપરકણો સાથે કામ પાર પાડવામાં તલ્લીન જોવા મળતો પ્રેમ. વડોદરાના સમા વિસ્તારમાં રહે છે અને ધોરણ 7માં અભ્યાસ કરે છે. તેણે ભણવાની સાથે સાથે અનેક ઈલેકટ્રોનિક ઉપકરણો બનાવ્યા છે. પ્રેમ ધોરણ 4 માં અભ્યાસ કરતો હતો ત્યારથી જ ઈલેકટ્રીક ઉપકરણો બનાવવામાં રસ છે. પ્રેમે અલગ અલગ ડ્રોન કેમેરા બનાવ્યા છે. જેમાં એમ્બુલન્સ ડ્રોન, એગ્રીકલ્ચર ડ્રોન, ફાયર ફાઈટીંગ ડ્રોન, સિડબોમ્બ ડિસ્પેન્સીંગ ડ્રોનનો સમાવેશ થાય છે. 

13 વર્ષના બાળકે બનાવી સ્માર્ટ કાર 

નોંધનીય છે કે, પ્રેમે સ્માર્ટ કાર પણ બનાવી છે. સ્માર્ટ કારની સામે કોઈ વાહન આવે તો કાર જાતે જ સ્ટોપ થઈ જાય છે. 13 વર્ષના પ્રેમે પ્રજ્ઞાચક્ષુ લોકો માટે સ્માર્ટ ટી શર્ટ, ટોપી અને બુટ પણ બનાવ્યાં છે. આ  પ્રકારના બુટ પહેરી કોઈ પ્રજ્ઞાચક્ષુ વ્યક્તિ ચાલતા હોય અને તેમની સામે કોઈ અંતરાય આવી જાય તો બઝર વાગવા લાગે છે  અને પ્રજ્ઞાચક્ષુ વ્યક્તિ અલર્ટ થઈ જાય. પ્રેમને ભવિષ્યમાં સાયન્ટિસ્ટ બનવું છે અને દેશનું નામ રોશન કરવું છે.

ઘરમાં જ બનાવેલી લેબોરેટરીમાં કર્યું કામ

પ્રેમે ઈલેકટ્રોનીક ઉપકરણો બનાવવા માટે પોતાના ઘરમાં જ એક લેબોરેટરી બનાવી છે જેમાં બેઠા બેઠા તે કામ કરે છે. ભણવામાં પણ તે હોશિયાર છે. પ્રેમના માતા, પિતા અને દાદા તેને ઘણી  મદદ કરે છે. પ્રેમના માતા, પિતા અને દાદા કહે છે કે અમે નોબલ પ્રાઈઝ વિઝેતા અને વૈજ્ઞાનિક વેંકટ રામનના ઘરમાં રહીએ છીએ જેની અસર પ્રેમ પર પડી છે અને તે નાની ઉંમરમાં જ આટલો હોશિયાર છે.    

પ્રેમે ઈલેકટ્રોનીક ઉપકરણ બનાવવા ઇન્ટરનેટની લીધી મદદ

પ્રેમે ઈલેકટ્રોનીક ઉપકરણ બનાવવા માટે પોતાના વિચારો ઉપરાંત ઈન્ટરનેટની પણ મદદ લીધી છે. પ્રેમ યૂ ટયુબ અને ગુગલ પરથી ડ્રોન કેમેરા બનાવવા માટેની માહિતી મેળવે છે તેમજ તેનાથી પ્રેરણા પણ લે છે. સાથે જ પ્રેમે પોતાની ડ્રોન ઈનવેન્ટરી નામની વેબસાઈટ પણ બનાવી છે. આમ પ્રેમ આજના બાળકો માટે પ્રેરણારૂપ બની રહ્યો છે.