વાર-પલટવાર / પેપર ફૂટ્યું હોય તો કોંગ્રેસ પુરાવા આપે, વનરક્ષક પેપરમાં ગેરરીતિ મામલે જીતુ વાઘાણીનું નિવેદન

• વન રક્ષક કોપીકેસનો મામલો
• કોંગ્રેસના ધારાસભ્યોએ કર્યું ગૃહ બહાર પ્રદર્શન
• પેપર લીકની વારંવાર બનતી ઘટનાઓ સામે વિરોધ પ્રદર્શન

વન રક્ષક કોપીકેસ અને પેપરકાંડ મામલે ગૃહમાં હોબાળો થયો હતો. કોંગ્રેસના ધારાસભ્યોએ સરકારના રાજીનામાની માગ કરી છે. તેમજ ગૃહની બહાર કોંગ્રેસના ધારાસભ્યોએ પેપર લીકની વારંવાર બનતી ઘટનાઓ સામે વિરોધ પ્રદર્શન પણ કર્યું છે. સમગ્ર મામલે સરકારના પ્રવકતા જીતુ વાઘાણીએ કોંગ્રેસ પર તો કોંગ્રેસ નેતા અમિત ચાવડાએ સરકાર પર આકાર વાર પ્રહાર કર્યા હતા.

પેપર નથી ફૂટ્યું કોંગ્રેસ ફૂટેલી છે: મંત્રી જીતુ વાઘાણી
પેપર લીક આક્ષેપ મામલે જીતુ વાઘાણીએ  કોંગ્રેસ પર પ્રહાર કરતા કહ્યું છે કે લેખિત એક્ઝામની શરૂવાત નરેન્દ્ર મોદીના નેતુત્વમાં થઈ, ભરતીમાં ફોર્મ ભર્યા વગર પણ લોકોને નોકરી મળી જતી પણ હવે જો વન સરક્ષકનું જો પેપર ફૂટ્યું હોય તો આધાર પુરાવા આપે, કોંગ્રેસના યુવાનોનું મનોબળ તોડવાના પ્રયાસ કરી  નકારાત્મક માનસિકતા ધરાવી રહી છે. વન રક્ષકની પરીક્ષામાં ચોરી થઈ છે. આકરી તપાસ કરવાના આદેશ સીએમ એ પણ આપ્યા છે. કોંગ્રેસ રાજ્યના યુવાનોને ગેરમાર્ગે ન દોરે આ સાથે જ ચેલેન્જ કર્યો હતો કે પુરાવા હોય તો સરકાર અને જનતા સામે મૂકે, જે પોતે જ ફૂટેલા હોય તેમણે બધુ પેપર ફૂટલા જ લાગે, કોંગ્રેસની બેધારી નીતિ છે, આ કેસમાં અમારે કઈ છુપાવવાનુ નથી. 

ગુજરાતના યુવાનનું ભાગ્ય ફૂટ્યું: અમિત ચાવડા
આ સમયે કોંગ્રેસના નેતા અમિત ચાવડાએ જણાવ્યુ હતું કે પેપર નથી ફૂટતા ગુજરાતના યુવાનનું ભાગ્ય ફૂટે છે. યુવાનો વિરોધ કરે છે તો તેમના અવાજને દબાવામાં આવે છે. ભાજપના મળતિયાઓ પેપર લિન્કમાં સંડોવાયેલા હોય છે તેમણે લાભ કરાવામાં આવે છે. 14 વાર પેપર લીક થયા એમાં કોઈની જવાબદારી નક્કી થઇ નથી. આ પહેલુ પેપર નથી ફૂટ્યું 14મું પેપર ફૂટ્યું છે. હક માંગવા આવતા યુવાનોને હેરાનગતિ કરવામાં આવે છે પણ હવે ગુજરાતના યુવાનો પણ માર્ગો પર ઉતરશે અમે ગૃહમાં પણ પેપર લીકના મુદ્દાઓ ઉઠાવીશું

કઈ રીતે આરોપીએ પેપરમાં ગેરરીતિ આચરી?
મહેસાણાના ઉનાવામાં વનરક્ષક પરીક્ષામાં કોપીકેસ મામલે તપાસમાં મોટો ખુલાસો થયો છે. સુમિત ચૌધરીને સવારે 9 વાગે શાળાના ધાબા પર પેપર સોલ્વ કરવાની જવાબદારી સોંપવામાં આવી હતી. રાજુ ચૌધરી નામનો શિક્ષક આ કેસમાં મુખ્ય આરોપી છે. માયા ઉર્ફે મનીષા ચૌધરીને પાસ કરાવવા આ ષડયંત્ર રચાયું હતું.. શાળાના પટ્ટાવાળાએ ગેરહાજર વિદ્યાર્થીના પેપરના ફોટો પાડ્યા હતા. પટ્ટાવાળાએ ફોટો પાડીને રાજુ અને સુમિતને મોકલ્યા હતા. આ દરમિયાન પાણી પીવા આવેલો રવિ મકવાણા કોપી જોઈ ગયો હતો. જેથી આરોપીઓએ રવિ મકવાણાને પણ જવાબ આપ્યા હતા. માયા ચૌધરીને પાસ કરાવવા સુપરવાઈઝરે પણ મદદ કરી હતી. પણ રવિ મકવાણા કોપી કરતા પકડાઈ ગયો હતો. અને હોબાળો થતાં પટ્ટાવાળાએ કાગળ સળગાવી દીધો હતો. હવે વિસનગર DySP અતુલ વાળંદને આ તપાસ સોંપવામાં આવી છે.