દમણમાં જાહેરસભા દરમિયાન સ્ટેજ તૂટ્યુ, ઉમેદવાર નીચે ખાબક્યા

લોકસભાની ચૂંટણી નજીક આવી રહી છે ત્યારે ચૂંટણી પ્રચારનો પણ ધમધમાટ ચાલી રહ્યો છે. તેવામાં કેટલીક દુર્ઘટનાઓ પણ સામે આવી રહી છે. ત્યારે એક જાહેર સભા દરમિયાન મંચ તૂટી પડ્યું હતું. સંઘ પ્રદેશ દમણમાં જાહેર સભામાં સ્ટેજ તૂટવાની ઘટના સામે આવી છે. અપક્ષના ઉમેદવાર સભા કરી રહ્યા હતા આ દરમિયાન સ્ટેજ તૂટ્યુ હતું. મળતી માહિતી મુજબ અપક્ષના લોકસભાના ઉમેદવાર ઉમેશ પટેલે જાહેર સભાનુ આયોજન કર્યુ હતું. 

આ દરમિયાન તેઓ સ્ટેજ પર ભાષણ આપી રહ્યા હતા. આ દરમિયાન એકાએક સ્ટેજ તૂટ્યુ હતું. સ્ટેજ તૂટતા ઉમેશ પટેલ નીચે પડ્યા હતા. જોકે તેઓ ત્યારે જ ફરીથી સ્ટેજ પર ચઢીને ફરીથી સભાને સંબોધી હતી.



ઉત્તરપ્રદેશમાં કાર્યકર્તાઓથી ભરેલો મંચ ધરાશાયી થયો હતો
થોડા દિવસો અગાઉ ઉત્તરપ્રદેશના સંભાલમાં એક કાર્યક્રમ દરમિયાન સ્ટેજ ધરાશાયી થવાની ઘટના સામે આવી હતી. સંભલ જિલ્લાના અસમોલી વિધાનસભા વિસ્તારમાં સોધન ગામના ધ્વજા મેળા કાર્યક્રમ દરમિયાન ભાજપ દ્વારા હોળી મિલન કાર્યક્રમનું આયોજન કરવામાં આવ્યું હતું. આ કાર્યક્રમ દરમિયાન મોટી સંખ્યામાં કાર્યકર્તાઓ સ્ટેજ પર ચઢી જતા સ્ટેજ તૂટી પડ્યુ અને અનેક કાર્યકર્તાઓ ગબડી પડ્યા હતા. સ્ટેજ ધરાશયી થતા ભાજપ કિસાન મોર્ચાના ઉપાધ્યક્ષ અવધેશ યાવદ અને ભાજપના પૂર્વ MLC પપ્પૂ ઈજાગ્રસ્ત થયા હતા. અવધેશ યાદવના પગમાં ફ્રેક્ચર થયુ હતા.

મહત્વનું છે કે કાર્યક્રમ દરમિયાન મોટી સંખ્યામાં કાર્યકર્તાઓ સ્ટેજ પર ઉમટ્યા હતા. જોકે, સ્ટેજ મર્યાદિત સંખ્યા માટે જ બાંધવામાં આવ્યો હતો અને વધુ સંખ્યામાં કાર્યકર્તાઓ સ્ટેજ પર ધસી આવતા આ દુર્ઘટના સર્જાઈ હતી.