નવો પેપરકાંડ / અમારુંય પેપર લીક થયું હતું, કેટલાંય નોકરી લાગી ગયા, કાર્યવાહી કરો નહીંતર આંદોલન કરીશું

• સ્ટાફ નર્સની પરીક્ષામાં પેપર લીકનો આક્ષેપ
• યોગ્ય કાર્યવાહી નહીં થાય તો આંદોલનની ચીમકી
• હેડ કલાર્ક પેપર ફૂટ્યું હોવાનો થયો છે ખુલાસો

હેડ ક્લાર્ક પેપરલીક કાંડમાં 11 આરોપીઓ સામે પ્રાંતિજ પોલીસ સ્ટેશનમાં ગુનો નોંધવામાં આવ્યો છે. ત્યારે આરોપીઓની પૂછપરછ અને તેના વિરૂદ્ધ કાર્યવાહી શરૂ કરી દેવામાં આવી છે. ત્યારે બીજી તરફ હવે પેપરકાંડ મામલે નર્સિંગ યુનિયને ચીમકી ઉચ્ચારી છે. ઓલ ગુજરાત નર્સિંગ યુનિયને આરોગ્ય મંત્રીને પત્ર લખ્યો છે. અગાઉ 20 જૂને લેવાયેલી સ્ટાફ નર્સની પરીક્ષામાં પેપર લીક થયા હોવાનો આક્ષેપ કર્યો છે. સ્ટાફ નર્સમાં અનેક લોકો પેપર લીક થવાથી નોકરી પર લાગ્યા હોવાનો આક્ષેપ કરાઇ રહ્યો છે. જો કાર્યવાહી નહીં કરવામા આવે તો ઉગ્ર આંદોલન કરવાની નર્સિંગ યુનિયને ચીમકી ઉચ્ચારી છે.

ઉમેદવારોએ આરોગ્ય તબીબ સેવાઓ કમિશનરને લખ્યો હતો પત્ર

અગાઉ સ્ટાફ નર્સ વર્ગ-3ની પરીક્ષામાં કંઈ ખોટું થયાની આશંકાએ પરીક્ષા આપેલા ઉમેદવારોએ આરોગ્ય તબીબ સેવાઓ કમિશનરને પત્ર લખ્યો હતો. પરીક્ષા આપેલા ઉમેદવારોએ વોટ્સએપ ગ્રુપમાં પણ કંઈક ખોટું થયું હોવાની ચર્ચા કરી હતી. મહત્વનું છે કે, 20 જૂને યોજાયેલી પરીક્ષામાં પ્રશ્નપત્રનું સીલ તૂટેલી હાલતમાં જોવા મળ્યું હતું.

45000થી વધુ ઉમેદવારોએ આપી હતી પરીક્ષા

ગુજરાત સરકાર દ્વારા 20 જૂન 2021ના રોજ સ્ટાફ નર્સ પરીક્ષા લેવાઇ હતી. આ પરીક્ષામાં 55000થી વધુ ફોર્મ ભરાયેલા અને તેમાં 45000થી વધુ લોકોએ પરીક્ષા આપી હતી.

હાલ તો હેડ ક્લાર્કની પરીક્ષા થઇ શકે છે રદ્દ

હેડક્લાર્કની પરીક્ષાનું પેપર લીકનો મામલો સામે આવતાની સાથે સરકાર પણ એક્શનમાં દેખાઇ રહી છે. રાજ્ય સરકારની પરીક્ષાના નિર્ણયને લઇને એક ઉચ્ચસ્તરીય બેઠક યોજાઇ શકે છે. આ બેઠક મુખ્યમંત્રી ભૂપેન્દ્ર પટેલ સાથે યોજાશે. બેઠકમાં મુખ્યમંત્રીને પેપરલીક સંબંધિત તમામ માહિતી આપવામાં આવશે. આ બેઠકમાં ગૃહ રાજ્યમંત્રી, અસિત વોરા સહિત ઉચ્ચ અધિકારીઓ હાજર રહેશે. પેપર લીક થયાનો વ્યાપ અને તપાસ સંદર્ભે ચર્ચા થશે. પરીક્ષા રદ્દ કરવા મામલે પણ આ બેઠકમાં નિર્ણય લેવાશે.