આજે વોશિંગ્ટનમાં અમેરિકાના રાષ્ટ્રપ્રમુખ ડોનાલ્ડ ટ્રમ્પ અને સ્પીકર નેન્સી પેલોસી વચ્ચે કડવાશ જોવા મળી હતી. ડોનાલ્ડ ટ્રમ્પે સ્પીકર નેન્સી પેલોસી સાથે હાથ મીલાવનું ટાળ્યું હતું જેના બદલામાં નેન્સીએ ટ્રમ્પની પીઠ પાછળ તેમની સ્પીચ લખેલો કાગળ ફાડી નાખ્યો હતો.
ડોનાલ્ડ ટ્રમ્પે સ્પીકર નેન્સી પેલોસી સાથે હાથ ન મિલાવ્યા
આવતી કાલે મહાભિયોગ પર વોટિંગ
આજે વોશિંગ્ટનમાં અમેરિકાના રાષ્ટ્રપ્રમુખ ડોનાલ્ડ ટ્રમ્પ અને સ્પીકર નેન્સી પેલોસી વચ્ચે કડવાશ જોવા મળી હતી. ડોનાલ્ડ ટ્રમ્પે અમેરિકન સંસદના બંને ગૃહોનાં સંયુકત સત્રને સંબોધન કર્યું હતું. ટ્રમ્પનું આ ત્રીજું સ્ટેટ ઓફ ધી યુનિયન સંબોધન હતું. આ વખતે સ્ટેટ ઓફ ધી યુનિયનનો થીમ 'ઇટસ ધ ગ્રેટ અમેરિકન કમબેક' હતો.
આ દરમ્યાન ડોનાલ્ડ ટ્રમ્પ અને સંસદના નીચલા ગૃહ હાઉસ ઓફ રિપ્રેઝન્ટેટીવ્ઝનાં સ્પીકર નેન્સી પેલોસી વચ્ચે બરાબર જામી હતી. દરમ્યાન અમેરિકન સંસદના ઉપલા ગૃહ સેનેટમાં આવતી કાલે ટ્રમ્પ સામેના મહાભિયોગ પ્રસ્તાવ પર વોટિંગ થશે.
ટ્રમ્પનાં સંબોધન પૂર્વે પોડિયમ તરફ જતી વખતે પેલોસીએ પોતાની ચેર પરથી ઊભા થઇ અભિવાદન માટે ટ્રમ્પ સાથે હાથ મિલાવવા પોતાનો હાથ લાંબો કર્યો ત્યારે ડોનાલ્ડ ટ્રમ્પે તેની ઉપેક્ષા કરી તેની સાથે હાથ મિલાવ્યા ન હતા. ડોનાલ્ડ ટ્રમ્પનાં ભાષણ દરમ્યાન ઉપરાષ્ટ્રપતિ માઇક પેન્સે અનેક વખત ઊભા થઇ તાળીઓથી ટ્રમ્પનું અભિવાદન કર્યું હતું. પરંતુ સ્પીકર નેન્સી પોતાની જગ્યા પર બેઠાં રહ્યાં હતાં અને એક વાર પણ ટ્રમ્પનાં ભાષણને બિરદાવ્યું ન હતું. ત્યારબાદ ટ્રમ્પનું ભાષણ સમાપ્ત થતાંની સાથે જ સ્પીકર નેન્સી પેલોસીએ સંસદમાં સૌની સામે ટ્રમ્પનાં ભાષણની કોપી ફાડી નાખી હતી.
ડોનાલ્ડ ટ્રમ્પે પોતાનાં ભાષણમાં કોરોના વાઇરસ ની સમસ્યા પણ જણાવ્યું હતું કે અમે ચીન સાથે મળીને તેનો ઉકેલ શોધી રહ્યા છીએ. મારું પ્રશાસન નાગરિકોને કોરોનાથી બચાવવા માટે તમામ પ્રયાસો કરી રહ્યું છે. ચીને દાયકાઓ સુધી અમેરિકાનો ફાયદો ઉઠાવ્યો છે જેને અમે હવે રોકી દીધું છે.