શ્વેતા તિવારી અને અભિનવ કોહલી વચ્ચે અણબનાવ ચાલુ જ છે. ઘણાં સમયથી શ્વેતા અને અભિનવ વચ્ચે પ્રોબ્લેમ્સ ચાલી રહ્યાં છે. 2019માં શ્વેતાએ પોલીસમાં અભિનવ વિરુદ્ધ ઘરેલુ હિંસાની ફરિયાદ પણ નોંધાવી હતી. જોકે, શ્વેતાએ હજી સુધી જાહેરમાં આ અંગે કોઈ વાત કહી નથી. પરંતુ અભિનવ કોહલી સોશિયલ મીડિયા પર શ્વેતા અને તેની દીકરી પલક માટે ઘણી વાતો કહેતા જોવા મળે છે. ત્યારે હવે અભિનવે શ્વેતા પર તેમના દિકરાને ગાયબ કરવાનો આરોપ લગાવ્યો છે.
શ્વેતા તિવારી અને અભિનવ વચ્ચે વધ્યો વિવાદ
અભિનવે શ્વેતા પર લગાવ્યો ગંભીર આરોપ
થોડાં સમય પહેલાં જ શ્વેતા તિવારીને કોરોના પોઝિટીવ આવ્યો હતો, જેના કારણે તેણે દિકરા રેયાંશની જવાબદારી પતિ અભિનવ કોહલીને સોંપી હતી. જ્યારે દીકરી પલક શ્વેતાની સાથે જ હતી. ત્યારે હવે અભિનવે શ્વેતા પર ચોંકાવનારો આરોપ લગાવ્યો છે. તેનું કહેવું છે કે, શ્વેતા રેયાંશને એવી જગ્યાએ લઈ ગઈ છે જેના વિશે મને કંઈ જ ખબર નથી. રેયાંશ અભિનવ સાથે 40 દિવસ હતો અને ગયા રવિવારે જ શ્વેતા તેને લઈ ગઈ. તેનું કહેવું છે કે, તેમનો દીકરો ગાયબ થઈ ગયો છે.
અભિનવનું કહેવું છે કે, તેણે પાંચ દિવસથી તેના દિકરા સાથે કોઈ જ વાત કરી નથી. તેણે એક ઈન્ટરવ્યૂમાં જણાવ્યું કે, રવિવાર(25 ઓક્ટોબર)થી મારો દિકરો રેયાંશ ગાયબ છે. મને ખબર નથી કે તે ક્યાં છે. છેલ્લા 40 દિવસથી તે મારી સાથે હતો. પરંતુ ગયા રવિવારથી શ્વેતા મારા દીકરાને કોઈ અજાણ્યા સ્થળે લઈ ગઈ છે અને તેણે મને તે વિશે કંઈ જ જણાવ્યું નથી. રવિવારથી હું શ્વેતા સાથે વાત કરવાનો પ્રયાસ કરી રહ્યો છું પરંતુ શ્વેતા મારા ફોન કોલ્સ અને મેસેજનો જવાબ પણ આપતી નથી. અભિનવ શ્વેતાના શૂટિંગ સેટ પર પણ જઈ આવ્યો, તેણે દરેક પ્રયાસ કરી લીધા છતાં દિકરા સાથે સંપર્ક થયો નથી.
અભિનવે જણાવ્યું કે, હું શ્વેતાના સેટ પર પણ ગયો હતો. મને લાગ્યું કે એ મને ઈગ્નોર કરશે પણ હું મારા દિકરાને તો જોઈ શકીશ. મૈં રેકોર્ડિંગના પુરાવા રાખવા વીડિયો પણ બનાવ્યો પરંતુ તેણે મારી સાથે વાત કરી નહીં. મારો મેસેજ પણ તેના સુધી પહોંચી ગયો પરંતુ તેનો કોઈ જવાબ આવ્યો નહીં.