મધ્ય પ્રદેશમાં ઈન્દોર પોલીસની કસ્ટડીમાં આવેલા બાંગ્લાદેશી યુવતીઓના તસ્કર મુનીર ઉર્ફ મુનીરૂલે પૂછપરછમાં ચોંકાવનારા ખુલાસા કર્યા છે. આરોપીએ બાંગ્લાદેશમાંથી 200થી વધુ બાંગ્લાદેશી યુવતીઓને લાવીને દેહ વ્યાપારના ધંધામાં ધકેલી દીધી હતી.
બાંગ્લાદેશી યુવતીઓના તસ્કરે પૂછપરછમાં કર્યા ચોંકાવનારા ખુલાસા
200થી વધુ બાંગ્લાદેશી યુવતીઓને દેહ વ્યાપારના ધંધામાં ધકેલી હતી
આરોપી અત્યાર સુધી 75 યુવતીઓના લગ્ન કરાવી ચૂક્યો છે
આરોપીની સુરતમાંથી કરાઈ ધરપકડ
આરોપી દર મહિને 55થી વધુ યુવતીઓને લાવતો હતો. 5 વર્ષથી તે આ ધંધામાં છે. આરોપી 75 યુવતીઓના અત્યાર સુધી લગ્ન કરાવી ચૂક્યો છે. ગુરૂવારે ઈન્દોર એસઆઈટીએ મુનીરની સુરતમાંથી ધરપકડ કરી હતી.
આરોપી યુવતીઓને બાંગ્લાદેશ અને ભારતની પોરસ બોર્ડરના નાળાના રસ્તેથી લાવતો હતો અને બોર્ડરની પાસે નાનકડા ગામમાં એજન્ટ્સ દ્વારા યુવતીઓને મુર્શિદાબાદ અને આજુબાજુના ગ્રામ્ય વિસ્તારોમાં લઇને ભારતમાં પ્રવેશ કરાવતો હતો. ઈન્દોર પોલીસે 11 મહિના પહેલાં લસૂડિયા અને વિજય નગર વિસ્તારોમાં ઓપરેશન ચલાવીને 21 બાંગ્લાદેશી યુવતીઓને રેસ્ક્યુ કરાવીને છોડાવી હતી. જેમાં 11 બાંગ્લાદેશી યુવતીઓ અને બાકી અન્ય યુવતીઓ હતી. આ મામલે સાગર ઉર્ફે સેંડો, આફરીન, આમરીન અને અન્ય લોકો આરોપી બનાવ્યા હતા. મુનીર નાસી ગયો હતો. તેને ગુરૂવારે સુરતમાંથી ઈન્દોર લાવવામાં આવ્યો હતો.
મુનીર પર 10 હજાર રૂપિયાનું ઈનામ રાખવામાં આવ્યું
ઈન્દોર પોલીસે મુનીર પર 10 હજાર રૂપિયાનું ઈનામ રાખ્યુ હતુ. મુનીર બાંગ્લાદેશનો જસોરનો રહેવાસી છે. તે મોટાભાગની યુવતીઓને લગ્ન કરાવી ભારતમાં વેચી દેતો હતો. તેની પાછળ મોટું નેટવર્ક છે. મુનીર પાસેથી જાણવા મળ્યું કે સેક્સ રેકેટ સાથે જોડાયેલી યુવતીઓને પહેલા કલકત્તા અને પછી મુંબઈમા ટ્રેનિંગ કરાવે છે. ત્યારબાદ ડિમાન્ડ પર યુવતીઓને દેશના બીજા શહેરો અને અન્ય શહેરોમાં સપ્લાય કરતો હતો.