ભારતમાં સેકન્ડ હેન્ડ મોબાઇલનું મોટું માર્કેટ છે. ઘણા લોકો નવો મોબાઇલ લોન્ચ થતાં તે ખરીદવા પોતાનો જુનો મોબાઇલ વેચી દેતા હોય છે. ઓનલાઇન પણ હવે તો મોબાઇલ આસાનીથી વેચી શકાય છે. જોકે મોબાઇલ વેચતા પહેલા કેટલીક બાબતોનું ધ્યાન રાખવું જરુરી છે. નહીંતર થોડી બેદરકારી કે જાણકારીનો અભાવ તમને મુશ્કેલીમાં મુકી શકે છે.
મોટાભાગના લોકો માત્ર સિમકાર્ડ કાઢી લઇ મોબાઇલ વેચી દે છે. અને ગુગલ સહિતના વિવિધ એકાઉન્ટમાંથી લોગ આઉટ કરવાની પણ દરકાર લેતા નથી.
આવી સ્થિતિમાં, તમારો ખાનગી ડેટા મોબાઇલ લેનારના હાથમાં આવી જાય છે અને તે તેનો દુરુપયોગ પણ કરી શકે છે. આજે અમે તમને કેટલીક ટીપ્સ આપવા જઈ રહ્યા છીએ જે તમે મોબાઇલ વેચશો ત્યારે ખૂબ ઉપયોગી થશે.
મોબાઇલ વેચતા પહેલા, ફેસબુક, ટ્વિટર અને ઇન્સ્ટાગ્રામ જેવા એકાઉન્ટમાંથી અચુક લોગઆઉટ કરવું જોઇએ. આ ઉપરાંત મોબાઇલ વેચતા પહેલા તેને ફેકટરી રિસેટ પણ ભુલ્યા વગર કરવો જોઇએ. જેથી તમારો બધો ડેટા તેમાંથી ઇરેજ થઇ જાય છે.
આ પ્રોસેસ કરતાં પહેલા જરુર લાગે તો તમારે તમારા બધા ડેટાનો બેકઅપ કલાઇડ સર્વર અથવા તમારા પીસી કે લેપટોપ કે પછી હાર્ડ ડ્રાઇવમાં લઇ લેવો જોઇએ. તે પહેલા ગુગલ ક્રોમ કે અન્ય બ્રાઉઝરમાં સેવ કરેલા તમામ પાસવર્ડ પણ તેના સેટિંગમાં જઇને રિમુવ કરી દેવા જોઇએ.
બ્રાઉઝરના પ્રોફાઇલ પર સેવ્ડ પાસવર્ડના ઓપ્શન ઓપન કરતાં તમે સેવ કરેલા તમામ પાસવર્ડ દેખાશે. આ પછી ત્રણ ડોટ પર કલિક કરતાં રિમુવનો ઓપ્શન દેખાશે. તેના પરથી તમે તમારા તમામ પાસવર્ડ ડિલીટ કરી શકો છો.