BIG NEWS / મોટા સમાચાર : ગુજરાતના દિગ્ગજ પાટીદાર નેતાની સુરક્ષા વધારાઈ, મુખ્યમંત્રી બનાવાય તેવા સંકેત

• નીતિન પટેલ મુખ્યમંત્રી બને તેવા મળી રહ્યા છે સંકેત
• નીતિન પટેલના ઘરે પોલીસ સુરક્ષા વધારાઈ
• સુરક્ષાના ભાગરૂપે નીતિન પટેલની ગાડીની પણ તપાસ થઈ

નીતિન પટેલનાં ઘરની સુરક્ષા વધારી દેવામાં આવી
ગુજરાતનાં નવા મુખ્યમંત્રી કોણ હશે તેના પર સસ્પેસ યથાવત છે અને રાજ્યમાં પાટીદાર મુખ્યમંત્રી આવે તેવી પ્રબળ શક્યતાઓ છે ત્યારે રાજ્યના પૂર્વ નાયબ મુખ્યમંત્રી અને દિગ્ગજ પાટીદાર નેતા નીતિન પટેલનાં ઘરની સુરક્ષા વધારી દેવામાં આવી છે. નીતિન પટેલનાં ઘરે પોલીસનો ચુસ્ત બંદોબસ્ત છે અને સુરક્ષાનાં ભાગ રૂપે નીતિન પટેલનાં ગાડીની પણ તપાસ કરવામાં આવી છે. એવામાં એવા સંકેત મળી રહ્યા છે કે નીતિન પટેલને જ ગુજરાતનું સિંહાસન સોંપી દેવામાં આવે. જોકે અંતે ભાજપનું હાઇકમાન્ડ સરપ્રાઈઝ આપે તો પણ નવાઈ નહીં, આજે જ ભાજપનાં ધારાસભ્યોની બેઠક બોલાવવામાં આવી છે જેમા નવા નામની જાહેરાત કરવામાં આવશે. 

નરેન્દ્રસિંહ તોમર અને તરૂણ ચુગ ગુજરાત પહોંચ્યા
ગુજરાતમાં વિજય રૂપાણીનાં રાજીનામાં બાદ ભારતીય જનતા પાર્ટીમાં જોરદાર હલચલ જોવા મળી રહી છે. રાજ્યમાં નવા મુખ્યમંત્રીને લઈને તડામાર તૈયારીઓ શરૂ થઈ છે, સમગ્ર રાજ્યની નજર અત્યારે કમલમ પર છે અને કયું નામ સામે આવે છે તેની રાહ જોવામાં આવી રહી છે ત્યારે કેન્દ્રથી બે નેતાઓ નિરીક્ષક તરીકે ગુજરાતમાં આવેલા છે ત્યારે એરપોર્ટ પર નિરીક્ષકે મોટું નિવેદન આપ્યું છે. 

ધારાસભ્યમાંથી જ કોઈ એક CM હશે: નરેન્દ્રસિંહ તોમર
કેન્દ્રથી નરેન્દ્ર સિંહ તોમર અને તરુણ ચુગ ગુજરાત આવેલા છે અને પાટિલનાં નિવાસ સ્થાને આ મુદ્દે બેઠક કરવામાં આવી છે. આ બેઠક પહેલા એરપોર્ટ પર નરેન્દ્ર સિંહ તોમરે મોટું નિવેદન આપ્યું હતું. તોમરે કહ્યું કે જે પણ મુખ્યમંત્રી હશે તે ધારાસભ્યોમાંથી જ કોઈ હશે. તોમરે કહ્યું કે ધારાસભ્યો સાથે ચર્ચા કરવામાં આવશે અને અમે પાર્ટી અધ્યક્ષ સાથે ચર્ચા કરીને નવા મુખ્યમંત્રી અંગે ચર્ચા કરીશું.