આજે રાજ્યમાં ભારે વરસાદની આગાહી અનુસાર, સૌરાષ્ટ્ર અને દ.ગુજરાતમાં ભારે વરસાદ પડ્યો છે. રાજ્યમાં ચોમાસુ ધીરે ધીરે આગળ વધી રહ્યું છે. ત્યારે રાજકોટ, અમરેલી, ગીર, જૂનાગઢ, જામકંડોરણા, દ્વારકા, વલસાડ, નવસારી અને સુરતના વિસ્તારોમાં ભારે વરસાદ ખાબક્યો છે. તો ગોંડલમાં 30 મિનિટમાં 3 ઇંચ જેટલો વરસાદ ખાબક્યો છે. તો આવતીકાલ 30 જૂને અમદાવાદમાં પણ મેઘરાજા મહેર વરસાવી શકે છે.
ગુજરાતમાં બે દિવસ ભારે વરસાદ!
સૌરાષ્ટ્ર અને દક્ષિણ ગુજરાતમાં મેઘરાજાની ધમાકેદાર એન્ટ્રી
આવતીકાલે અમદાવાદમાં પણ વરસાદની આગાહી
રાજકોટમાં વરસાદી માહોલ
રાજકોટના ગ્રામ્ય વિસ્તારોમાં વરસાદી માહોલ છવાયો છે. જેતપુર, વીરપુર, ગોંડલ અને જામકંડોરણામાં પણ પવન સાથે વરસાદ પડ્યો હતો. ગાજવીજ સાથે વરસાદ પડતા રસ્તા પર પાણી વહ્યાં હતા. તો વિરામ બાદ વરસાદનું આગમન થતાં ખેડૂતોમાં ખુશીનો માહોલ છવાયો છે. રસ્તા પર વરસાદી પાણી પણ ભરાયા હતા.
ગોંડલમાં 30 મિનિટમાં 3 ઇંચ જેટલો વરસાદ
ગોંડલમાં ભારે પવન સાથે વરસાદ થયો છે. ગોંડલ માર્કેટયાર્ડમાં પાણી ભરાયા ગયા છે. તેમજ આ વરસાદથી ઠેર ઠેર પાણી ભરાય ગયા છે. તેમાય નીચાણવાળા ક્ષેત્રમાં તો ખૂબ પાણી ભરાય ગયા છે. આ રીતે જોઇએ તો 30 મિનિટમાં 3 ઇંચ જેટલો વરસાદ થયો છે.
અમરેલી જિલ્લામાં વરસાદ
રાજ્યમાં ચોમાસુ ધીરે ધીરે આગળ વધી રહ્યું છે ત્યારે અમરેલીમાં પણ મેઘરાજાની પધરામણી થઇ હતી. ખાસ કરીને અમરેલીના ગ્રામ્ય વિસ્તાર સારો વરસાદ વરસી રહ્યો છે. અમરેલીના ખાંભા,ધારી,બગસરા અને ડેડાણ સહિતના વિસ્તારોમાં વરસાદ થયો.....સારો એવો વરસાદ થતાં લોકો ગરમીથી રાહત અનુભવી રહ્યાં છે. ગીર અને ગીરના ગ્રામ્ય વિસ્તારોમાં વરસાદ પણ મેઘ મહેર થઇ છે. મોલી, ધોકડવા, શાણાવાંકીયા સહિત ગામોમાં વરસાદના પગલે ખેડૂતોમાં ખુશીનો માહોલ સર્જાયો છે.
જૂનાગઢમાં સારો વરસાદ
જૂનાગઢમાં શહેરમાં ધીમીધારે વરસાદ શરૂ થયો છે. આ સાથે શહેરના મધ્ય ભાગના વિસ્તારોમાં વરસાદી ઝાપટા પણ થયા છે. તો જૂનાગઢ, કેશોદ સહિત ગ્રામ્ય વિસ્તારમાં પણ સારો વરસાદ વરસી રહ્યો છે. વરસાદની ફરી એન્ટ્રી થતા ખેડૂતોમાં ખુશી જોવા મળી છે. તેમજ નીચાણવાળા વિસ્તારમાં પાણી ભરાય ગયા છે. જૂનાગઢના મધુરમ, ટીંબાવાડીમાં સારો એવો વરસાદ થતાં લોકોને ગરમીથી રાહત અનુભવી રહ્યાં છે.
દ્વારકા જિલ્લામાં હળવાથી સામાન્ય વરસાદ
દ્વારકા જિલ્લામાં વાદળછાયા વાતાવરણ વચ્ચે વરસાદી માહોલ જામ્યો છે. દ્વારકા જિલ્લામાં હળવાથી સામાન્ય વરસાદ પડી રહ્યો છે. વરસાદી માહોવ જામતા વાતાવરણમાં ઠંડક પ્રસરી ગઇ છે.
નવસારીમાં 10 દિવસના વિરામ બાદ વરસાદ
નવસારી જિલ્લામાં વરસાદી માહોલ જોવા મળી રહ્યો છે. દસ દિવસના વિરામ બાદ ફરી વરસાદનું આગમન થયું છે. વાવણી બાદ વરસાદ થતા ખેડૂતોમાં ખુશીનો માહોલ જોવા મળી રહ્યો છે. વાદળછાયા વાતાવરણ વચ્ચે વરસાદ શરૂ થયો છે.
વલસાડ જિલ્લામાં ફરી વરસાદી માહોલ
વલસાડ જિલ્લામાં ફરી વરસાદી માહોલ જોવા મળી રહ્યો છે. વલસાડ અને વાપીના આસપાસના વિસ્તારમાં વરસાદ થયો છે. વિરામ બાદ ફરી વરસાદ આવતા ખેડૂતોમાં આનંદની લાગણી જોવા મળી રહી છે. તો વરસાદના કારણે લોકોએ ગરમી અને ઉકળાટથી રાહત અનુભવી છે.
સુરતમાં ધોધમાર વરસાદ
સુરતમાં મેઘરાજાએ ધમાકેદાર એન્ટ્રી કરી છે. સુરતના અડજણ, રાંદેર, અઠવાલઈન્સમાં તેમજ નાનપુર, ભાગળ, પર્વતપાટિયામાં ઉધના, પાંડેસરા, વરાછામાં અનરાધાર વરસાદના કારણે અનેક વિસ્તારમાં પાણી ભરાઇ ગયા છે.