અચાનક જ ડૂંગળીના ભાવમાં કડાકો બોલી ગયો છે પાક બજારમાં આવતાની સાથે જ ડૂંગળીના ભાવ પ૦ ટકા ઘટી ગયા છે જેનો સીધો ફટકો ખેડૂતોને પડ્યો છે.
ડૂંગળીએ ખેડૂતોને રડાવ્યા અને ગૃહિણીઓ હરખાશે
એક સપ્તાહમાં જ ડૂંગળીના ભાવ પ૦ ટકા તળિયે
હાલ રૂ. ૧૦૦થી ર૦૦ પ્રતિમણ ભાવ
સમગ્ર ગુજરાતમાં ડૂંગળીનું સૌથી વધુ ઉત્પાદન સૌરાષ્ટ્રમાં થાય છે, જેમાં રાજ્યમાં ડુંગળીના કુલ વાવેતરના પ૦ ટકા કરતાં વધુ હિસ્સો હોય છે. ભાવનગર જિલ્લાનો મહુવા તાલુકો ડૂંગળીના વાવેતરમાં મોખરે છે, જ્યાં ડૂંગળીનું મોટા પાયે ઉત્પાદન કરવામાં આવે છે. અચાનક જ ડુંગળીના ભાવમાં કડાકો બોલી ગયો છે અને માત્ર એક સપ્તાહમાં જ ડુંગળીના ભાવ પ૦ ટકા તળિયે બેસી ગયા છે, પરંતુ ડુંગળીના ભાવ હવે રિટેલ બજારમાં ઓછા થઇ જશે, જે ગૃહિણીઓ માટે રાહતના સમાચાર છે. રસોડામાં ડુંગળી દરેક પ્રકારના ભોજનમાં વપરાય છે. આગામી ટૂંક સમયમાં રિટેલ બજારમાં વેચાતી ડુંગળી પણ અડધા ભાવે વેચાવાની શક્યતા છે.
ડૂંગળીના મણદીઠ રૂ. 100 સુધીના ભાવ
અત્યાર સુધી ભાવના મુદ્દે હસાવતી ડુંગળી અચાનક જ ખેડૂતોને રડાવી રહી છે. હમણાં સુધી માર્કેટયાર્ડમાં ખેડૂતોને ડુંગળીના મણદીઠ રૂ. પપ૦ સુધીના ભાવ મળી રહ્યા હતા, જ્યારે હાલ રૂ. ૧૦૦થી ર૦૦ પ્રતિમણ ભાવ થઈ ગયા છે. એકાએક ભાવ નીચે આવી જતાં ખેડૂતોને રોવાનો વારો આવ્યો છે. ડુંગળીના ઉત્પાદનનો ભરપૂર લાભ લોકલ ડીહાઈડ્રેશન પ્લાન્ટને થાય છે. એક સપ્તાહ પૂર્વે માર્કેટયાર્ડ ખાતે ડુંગળી લઈને વેચાણ માટે આવતા ખેડૂતોને ડુંગળીના રૂ. પપ૦ સુધીના સારા ભાવ મળી રહ્યા હતા, જ્યારે રવીપાકની સિઝન હવે પૂર્ણ થવાના આરે છે ત્યારે ખેડૂતો ખૂબ મોટા પ્રમાણમાં ડુંગળી લઈને વેચાણ માટે માર્કેટયાર્ડ ખાતે આવી રહ્યા છે.
ખર્ચ ઘણો આવક ઓછી
ખેડૂતોને ડુંગળીના વાવેતર પાછળ ઘણો ખર્ચ કરવો પડતો હોય છે, જેમાં બિયારણ, ખાતર, વાવણી, માવજત તેમજ લણવાની મજૂરી પાછળ ખૂબ ખર્ચ થાય છે, જે ભાવ ખેડૂતોને વેચાણમાં મળી રહ્યા છે એ ભાવે તો ખેડૂતોને ડુંગળી ઘરમાં પણ નથી પડતી, જેથી ડુંગળીના ભાવમાં કડાકો બોલી જતાં ખેડૂતોમાં હવે નિરાશાનો માહોલ છે.
ગત સિઝનમાં પણ ભાવ ગગળ્યા હતા
ડુંગળીના ભાવમાં બજારમાં સતત ઘટાડો થઇ રહ્યો છે. લાલ ડુંગળીના ભાવ ઘટી રહ્યા છે, તેની સાથે-સાથે હવે સફેદ ડુંગળીના ભાવમાં પણ થોડો ઘટાડો નોંધાયો છે.નાસિકનાં માર્કેટયાર્ડમાંથી ડુંગળીની આવક શરૂ થવાથી સૌરાષ્ટ્રમાં ડુંગળીનું માર્કેટ તૂટ્યું છે એવું અનુમાન લગાવવામાં આવી રહ્યું છે. ગત વર્ષે પણ આ સિઝન એટલે કે માર્ચ માસમાં ડુંગળીના ભાવ તળિયે ગયા હતા.