આદેશ / સાંડેસરા કેસમાં મોટી કાર્યવાહી; સ્પેશ્યલ કોર્ટે સાંડેસરા બંધુઓની સંપત્તિ જપ્ત કરવાનો આદેશ આપ્યો

15,600 કરોડની બેડ લોન્સની સાથે ભારતથી નાસી છૂટેલ સાંડેસરા ભાઈઓ માટે સ્પેશ્યલ કોર્ટે અગત્યનો આદેશ આપ્યો છે. 

એન્ફોર્સમેન્ટ ડિરેક્ટોરેટ (ED)ની ભલામણથી સ્પેશ્યલ કોર્ટે એક મહત્વનો નિર્ણય લીધો છે. સ્પેશ્યલ કોર્ટે  નીતિન સાંડેસરા, ચેતનકુમાર સાંડેસરા, દીપ્તિ ચેતન સાંડેસરા અને હિતેશકુમાર પટેલને સ્ટર્લિંગ બાયોટેક કેસમાં ફ્યુજીટીવ ઇકોનોમિક ઓફેન્ડર એટલે કે ભાગેડુ આર્થિક ગુનેગારો જાહેર કર્યા છે.

આ જાહેરાત કરતા એડિશનલ સેશન જજ ધર્મેન્દ્ર રાણાએ કહ્યું કે ED પાસે ગુનેગારોને  ફ્યુજીટીવ ઇકોનોમિક ઓફેન્ડર પુરવાર કરવા માટે પુરતા પુરાવા છે. 

EDનો દાવો છે કે આ ચારેય ગુનેગારોએ તેમની કંપનીઓ માટે મોટી લોન મંજૂર કરાવવા બેલેન્સ શીટ સાથે ચેડા કર્યા છે. 

શું છે આ જાહેરાતનો અર્થ

આ ભાગેડુઓને ફ્યુજીટીવ ઇકોનોમિક ઓફેન્ડર જાહેર કરવાનો અર્થ એ છે કે હવે દેશના ફ્જ્યુજીટીવ ઇકોનોમિક ઓફેન્ડર એક્ટ અનુસાર તેમની પ્રોપર્ટી જપ્ત કરી શકાશે. 

શું છે સાંડેસરા કેસ?

ગુજરાતના એક કોર્પોરેટ જૂથ સાંડેસરા ગ્રુપ સામે આંધ્ર બેંકની આગેવાની વાળા બેન્કિંગ કોન્સરટીયમે CBIમાં એક ફરિયાદ નોંધાવી હતી, જે આ બેન્કો - જેમાં આંધ્ર બેન્ક, યુકો બેન્ક, બેન્ક ઓફ ઈન્ડિયા, સ્ટેટ બેન્ક ઓફ ઈન્ડિયા ને અલ્હાબાદ બેન્ક સામેલ હતી - પાસેથી લગભગ 5000 કરોડની બેન્ક લોન ફ્રોડ કેસ મામલે હતી. આ ફરિયાદ CBIએ નોંધતા તેના આધારે EDએ સ્ટર્લિંગ બાયોટેક/ સાંડેસરા ગ્રુપ સામે મની લોન્ડરિંગનો કેસ નોંધ્યો હતો. 

છેતરપિંડીની કુલ રકમ 14500 કરોડથી વધુ

EDને જાણવા મળ્યું હતું કે સ્ટર્લિંગ બાયોટેક લિ. (SBL) / સાંડેસરા ગ્રૂપ અને તેના મુખ્ય પ્રમોટર્સ, નીતિન સંડેસરા, ચેતન સાંડેસરા અને દીપ્તિ સંડેસરાએ આ બેન્ક કન્સોર્ટિયમ સાથે કરેલી છેતરપિંડીની કુલ રકમ 14500 કરોડથી વધુની છે.  

2011માં આ કેસની તપાસ કરતાં આવકવેરા વિભાગને એક ડાયરી મળી હતી જેમાં વિવિધ પાર્ટીઓને અલગ અલગ કેશ ટ્રાનજેક્શનની વિગતો હતી જેમાં 2008 -09 માં તે સમયના આંધ્ર બેન્કના ડાયરેક્ટર અનુજ પ્રકાશ ગર્ગને 1.59 કરોડ આપ્યાની એન્ટ્રી પણ હતી, જેના આધારે તેની પણ ધરપકડ કરવાં આવી હતી, જેની પર આરોપ હતો કે રકમના બદલામાં  તેને સાંડેસરા બંધુઓની મદદ કરી હતી અને તે પૈસા કોલકાતા સ્થિત અનેક શેલ કંપનીઓની હેલ્પ વડે અલગ અલગ જગ્યાએ રોક્યા હતા. આ સિવાય દિલ્હી સ્થિત એક અન્ય વેપારી ગગન ધવન ની પણ ધરપકડ કરી હતી.