મોંઘવારીના માર વચ્ચે સાબરડેરી દ્વારા ઘીના ભાવમાં તોતિંગ વધારો ઝીંકાયો છે, પ્રતિકિલોએ ઘીના ભાવમાં 11 રૂપિયાનો વધારો કર્યો છે.
સાબરડેરીએ ઘીનો ભાવ વધાર્યો
પ્રતિકિલો 11 રૂપિયાનો ભાવ વધારો
36 દિવસમાં ત્રીજી વખત વધ્યા ભાવ
મોંઘવારીથી જનતા પરેશાન થઇ ગઇ છે. પ્રાથમિક જીવન જરુરી વસ્તુઓના ભાવમાં તોતિંગ વધારો નોંધાઇ રહ્યો છે. શાકભાજી, કઠોળ, દૂધ, ખાદ્યતેલના ભાવ આસમાને પહોંચ્યા છે. તેમાં પણ બાકી હતું તેમ સાબરડેરીએ ઘીમાં પ્રતિકિલો 11 રૂપિયાનો વધારો કર્યો છે. 36 દિવસમાં ત્રીજી વાર ભાવ વધારો કર્યો છે. જેને કારણે ગૃહિણીઓનું બજેટ ખોરવાયું છે. એક તરફ તેલના ભાવ આસમાને તો બીજી તરફ ઘીના વધતા ભાવે તો ગૃહિણીઓની કમર ભાંગી નાખી છે. એક બાદ એક તમામ વસ્તુઓના ભાવમાં વધારો થતા સામાન્ય નાગરિકને તો ઘર કેવી રીતે ચલાવવું તે પ્રશ્ન સતાવી રહ્યો છે. ત્યારે સાબરડેરીએ ઘીના ભાવમાં તોતિંગ વધારો કર્યો છે.
સાબરડેરીએ ફરી ઘીના ભાવમાં કર્યો વધારો
સાબરડેરીએ પ્રતિકિલોએ ઘીના ભાવમાં 11 રૂપિયાનો વધારો તોતિગ વધારો કર્યો છે. જે આજથી નવો ભાવ વધારો અમલી કરવામાં આવ્યો છે. 15 કિલો ઘી પહેલાં 9 હજાર 450 રૂપિયામાં મળતું હતું જે ભાવ વધારો થતાં 15 કિલો ઘીના હવે ભાવ 9 હજાર 615 થયા છે. તમને જણાવી દઈએ કે, સાબરડેરીએ 36 દિવસમાં ત્રીજી વખત ઘીના ભાવમાં વધારો કર્યો છે.
અમૂલે પણ દૂધના ભાવમાં વધારો કર્યો હતો
ગુજરાત કોઓપરેટિવ મિલ્ક માર્કેટિંગ ફેડરેશન લિમિટેડે શુક્રવારે માહિતી આપી હતી કે, અમૂલના દૂધના ભાવમાં પ્રતિ લિટર 3 રૂપિયા સુધીનો વધારો કરવામાં આવ્યો. દરેક પ્રકારના પાઉચવાળા દૂધની કિંમતમાં 3 રૂપિયાનો વધારો કરવામાં આવ્યો. દૂધના નવા ભાવ 3 ફેબ્રુઆરીથી લાગુ કરવામાં આવ્યાં છે.
આ સુધારા પછી અત્યારે અમૂલ ગોલ્ડની કિંમત 66 રૂપિયા પ્રતિ લિટર, અમૂલ તાજાની કિંમત 54 રૂપિયા પ્રતિ લિટર, અમૂલ ગાયનું દૂધ 56 રૂપિયા પ્રતિ લિટર અને અમૂલ A2 ભેંસના દૂધની કિંમત 70 રૂપિયા પ્રતિ લિટર છે. જોકે, આ ભાવ વધારો હાલ ગુજરાતમાં લાગુ નહીં થયો. અમૂલે કરેલો દૂઘના ભાવનો વધારો મહારાષ્ટ્ર, દિલ્હી અને કોલકત્તામાં લાગુ થયો છે.