ક્રાઈમ / મોટા સમાચાર : જાનલેવા હુમલામાં રશિયન પ્રેસિડન્ટ પુતિનનો આબાદ બચાવ, જાણો શું બની ઘટના

• રશિયન પ્રેસિડન્ટ વ્લાદિમીર પુતિનની હત્યાનો વધુ એક પ્લાન નિષ્ફળ 
• વ્લાદિમીર પુતિનની હાઈ સિક્યુરીટી કારની આગળ કરાયો હતો મોટો બ્લાસ્ટ
• કાર આગળ થયો મોટો બ્લાસ્ટ, તાબડતોબ લઈ જવાયા સલામત સ્થળે 

દુનિયાની સૌથી પાવરફૂલ હસ્તી રશિયાના પ્રમુખ પુતિન પર જીવનું જોખમ હોવાનું સાબિત થયું છે. તાજેતરમાં કોઈએ તેમને મારવાનો પ્લાન બનાવ્યો હતો પરંતુ તે નિષ્ફળ નીવડ્યો હતો. તેઓ જ્યારે બહારથી પોતાના ઘર બાજુ આવી રહ્યાં હતા ત્યારે રસ્તામાં તેમની કાર નજીક જોરદાર બ્લાસ્ટ થયો હતો જોકે આ ઘટનામાં તેમનો આબાદ બચાવ થયો હતો. 

પુતિનની કારની સામે જોરદાર બ્લાસ્ટ 
બુધવારે જનરલ જીવીઆર ટેલિગ્રામ ચેનલ પર આ માહિતી જાહેર કરવામાં આવી હતી. ટેલિગ્રામ ચેનલના એકાઉન્ટ અનુસાર, પુતિનની હાઈ સિક્યુરીટી લિમોઝિનના  આગળના ડાબા વ્હીલ નજીક જોરદાર વિસ્ફોટ થયો હતો. વિસ્ફોટને પગલે પુતિન અને સિક્યુરીટી મેન થથરી ઉઠ્યાં હતા. સુરક્ષાકર્મીઓ દ્વારા તાબડતોબ તેમની કારને સલામત ઠેકાણે લઈ જવાઈ હતી. જોકે આ ઘટનામાં પુતિનને કોઈ નુકશાન થયું નહોતું. પુતિન જ્યારે બહારથી તેમના ઘેર પાછા આવી રહ્યાં હતા ત્યારે આ ઘટના બની હોવાનું યુરો વિકલીએ તેના રિપોર્ટમાં જણાવ્યું છે. નિવાસસ્થાન તરફ જતા રસ્તામાં પુતિનની કારના કાફલામાં રહેલી પ્રથમ એસ્કોર્ટ કારને એમ્બ્યુલન્સ દ્વારા આંતરવામાં આવી હતી અને ત્યાર બાદ એક અજાણી કાર આગળ આવીને પુતિનની કારની સામે જોરદાર બ્લાસ્ટ કર્યો હતો. જોકે  કાર ગમે તેવા હુમલાની સામે ટક્કર લઈ શકે તેવી હોવાથી પુતિન બચી ગયા હતા.   

પુતિનની હત્યાના પાંચ પ્રયાસ
ઉલ્લેખનીય છે કે 2017ની સાલમાં ખુદ પુતિન કહી ચૂક્યા છે તેમની હત્યાના પાંચ પ્રયાસ કરાયા હતા. તાજેતરના સમયમાં રશિયાએ જ્યારે યુક્રેન પર આક્રમણ કર્યું ત્યારે પણ તેમના હત્યાની વાતો વહેતી થઈ હતી.