સંકટ / રશિયા-યૂક્રેન યુદ્ધના કારણે ગુજરાતના આ મોટા ઉદ્યોગને ફટકો, સુરતના વેપારી ચિંતામાં

• રશિયા અને યુક્રેન વચ્ચે બે મહિનાથી તંગદિલી 
• સુરતમાં 80 થી 90 % હીરા સુરતમાં થાય છે તૈયાર
• ઉત્પાદન કાપની સીધી અસર રત્ન કલાકારો પર  

રશિયા અને યુક્રેન યુદ્ધને લીધે રશિયા પર અનેક પ્રતિબંધો લાદવામાં આવ્યા છે. રશિયાની રફ ડાયમંડ સપ્લાય કરતી કંપની અલરોઝા પર પણ પ્રતિબંધ મુકવામાં આવ્યો છે. જેને લીધે સુરતના હીરા બજારમાં કાચા હીરાની તિવ્ર તંગી જોવા મળી રહી છે. રફ હીરાની અછતને પગલે  ઉત્પાદન પર કાપ મુકવાની નોબત આવી છે.

રશિયા અને યુક્રેન વચ્ચે બે મહિનાથી તંગદિલી 

સુરતના હીરા બજારમાં હાલ મીની વેકેશન જેવો માહોલ જોવા મળી રહ્યો છે. હીરા વ્યવસાયકારો ઉત્પાદન પર કાપ મુકવા મજબુર બન્યા છે. કારણ છે બજારમાં કાચા હીરાની તીવ્ર અછત. વિશ્વમાં તૈયાર હીરાની માંગ સારી જોવા મળી રહીં છે. જેની સામે કાચા હીરાની અછત હીરા વ્યવસાયકારોની મુશ્કેલી વધારી રહી છે. રશિયા અને યુક્રેન વચ્ચે બે મહિનાથી તંગદિલી વ્યાપેલી છે. 

સુરતમાં 80 થી 90 % હીરા સુરતમાં થાય છે તૈયાર

યુદ્ધનો માહોલ હોવાને લીધે તેની અસર સમગ્ર વિશ્વ પર જોવા મળી રહી છે. રશિયા વિશ્વમાં કાચા હીરાનું મહત્તમ ઉત્પાદન રશિયા કરે છે. 60 ટકા જેટલા કાચા હીરા રશિયા સપ્લાય કરે છે. વિશ્વમાં તૈયાર કરવામાં આવતા હીરા માંથી 80 થી 90 ટકા હીરા સુરતમાં પોલિસડ કરવામાં આવે છે. રફ હીરાની આવક ઘટતા સૌથી વધુ અસર સુરતના હીરા બજાર પર જોવા મળી રહી છે.
 
ઉત્પાદન કાપની સીધી અસર રત્ન કલાકારો પર  

સુરતમાં કાચા હીરાની અછત ની અસર જોવા મળી રહી છે. એક બાજુ વિશ્વ કોરોનાની ઝપેટ માંથી બહાર આવી રહ્યું છે તો બીજી બાજુ કાચા હીરાની અછત હીરા ઉદ્યોગ માટે પડતા પર પાતું સમાન પુરવાર થઇ રહી છે. વિશ્વમાં તૈયાર થતા મહત્તમ હીરા સુરતમાં બને છે ત્યારે ઉત્પાદન કાપની સીધી અસર રત્ન કલાકારો પર જોવા મળી રહી છે. સામાન્ય રીતે મેં મહિના માં હીરા બજારમાં વેકેશનનો માહોલ જોવા મળતો હોય છે પણ આ વખતે એપ્રિલ માસની શરૂઆતમાં જ હીરા બજારમાં વેકેશન જોવા મળી રહ્યું છે. વ્યવસાયકારો પણ કાચા હીરાની વધતી અછત થી ચિંતિત થઈ રહ્યા છે.