રેકોર્ડ / IND vs ENG : રોહિત શર્માની શાનદાર સદી, તોડી નાંખ્યાં અનેક રેકોર્ડ

• ઈન્ટરનેશનલ ક્રિકેટમાં 40 સદી ફટકારી
• મોહમ્મદ યુસુફ અને તિલકરત્ને દિલશાનને પાછળ છોડ્યા
• ન્યુઝિલેન્ડનાં રોસ ટેલરની બરાબરી કરી 

ભારતમાં 80ની એવરેજ

રોહિત શર્માએ તેનાં ટેસ્ટ કરિયરની સાતમી સદી ફટકારી છે. તેણે ઈંગ્લેન્ડ સામે પહેલી સદી લગાવી છે. રોહિતે તેની શતકીય ઈનિંગમાં 14 ચોકા અને 2 છક્કા લગાવ્યા છે. ભારતીય પીચો પર રોહિત શર્માની એવરેજ 80થી ઉપરની છે અને તેણે દરેક શતક હોમ ગ્રાઉન્ડ પર જ લગાવ્યા છે.

ઈન્ટરનેશનલ ક્રિકેટમાં 40મી સેન્ચ્યુરી

રોહિત શર્માએ ટેસ્ટ ક્રિકેટમાં સાત, વનડેમાં 29 અને ટી-20 ઈન્ટરનેશનલ મેચોમાં ચાર સદીઓ ફટકારી છે. ઈન્ટરનેશનલ ક્રિકેટમાં 40મી સદી ફટકારતાજ તેણે મોહમ્મદ યુસુફ અને તિલકરત્ને દિલશાનને પાછળ છોડી દીધા છે. બંને ખેલાડીઓએ 39-39 સદી ફટકારી છે. જ્યારે રોહિતે ન્યુઝિલેન્ડનાં અનુભવી બેટ્સમેન રોસ ટેલરની બરાબરી કરી લીધી છે.

રોહિતની આગળ કોહલી અને વોર્નર

વર્તમાન ખેલાડીઓની વાત કરીએ તો રોહિત શર્માની આગળ ફક્ત વિરાટ કોહલી 70 અને ડેવિડ વોર્નર 43 સદીઓ સાથે આગળ છે. ભારત તરફથી રોહિત શર્માથી વધુ સેન્ચ્યુરી સચિન તેન્ડુલકર (100), વિરાટ કોહલી (70) અને રાહુલ દ્રવિડ (48)એ લગાવી છે.

ભારતની શરુઆત રહી ખરાબ
બીજી ટેસ્ટની શરુઆતમાં ભારતીય કેપ્ટન વિરાટ કોહલીએ ટોસ જીતીને પહેલાં બેટીંગ કરવાનો નિર્ણય લીધો હતો. જોકે ભારતની શરુઆત ખૂબ ખરાબ રહી હતી. બીજી ઓવરમાંજ શુભમન ગીલ ખાતુ ખોલ્યા વગર ઓલી સ્ટોનની બોલ પર આઉટ થઈ ગયો હતો. પણ તેનો કોઈ પ્રભાવ રોહિતની બેટીંગ પર નહોતો પડ્યો.