મોસમ બેઇમાન / રાજ્યના વાતાવરણમાં પલટો, દક્ષિણમાં કમોસમી વરસાદ, કચ્છમાં ફુંકાયો પવન

રાજ્યમાં ફરી મોસમ પોતાનો મિજાજ બદલશે. વેસ્ટર્ન ડિસ્ટર્બન્સના કારણે બે દિવસ સુધી વાદળછાયું વાતાવરણ રહેશે. જેના કારણે લોકોને કાળઝાળ ગરમીમાંથી રાહત મળશે. આ ઉપરાંત હવામાન વિભાગનું માનવું છે કે, ઉત્તર ગુજરાતમાં કેટલાક વિસ્તારોમાં સામાન્ય વરસાદ પણ પડી શકે છે.
 
અરબ સાગરમાં વાવાઝોડાના અણસાર મળી રહ્યા છે. જેના કારણે ગુજરાતમાં વાવાઝોડું ત્રાટકી શકે છે. ગુજરાત સહિત રાજસ્થાન, પંજાબ, મહારાષ્ટ્ર, ગોવા અને હિમાચલ પ્રદેશમાં તેજ પવન ફૂંકાઈ શકે છે. ગુજરાતના દરિયા કાંઠે 40થી 50 કિમીની ઝડપે પવન ફુંકાઈ શકે છે. આગામી 24 કલાક સુધી માછીમારોને દરિયો ન ખેડવા માટે સૂચના પણ આપી દેવામાં આવી છે.
 
રાજ્યભરમાં અચાનક વાતાવરણમાં પલટો આવી ગયો છે. દક્ષિણ ગુજરાતમાં પવન સાથે કમોસમી વરસાદ પણ શરૂ થઈ ગયો હતો. નવસારીના વાંસદામાં વહેલી સવારતી ગાજવીજ સાથે કમોસમી વરસાદ પડ્યો હતો. બીજી તરફ કેરી અને ચીકુ જેવા પાકને નુકસાન થવાની શક્યતા છે.
 
રાજ્યના ખેડૂતો પર પણ ચિંતાના વાદળો ઘેરાયા છે. આ તરફ નર્મદાના સાગબારામાં પણ કમોસમી વરસાદ પડ્યો હતો. જેના કારણે ઉભા પાક અને કેરીના પાકને નુકસાન થવાની ભીતી સેવાઈ રહી છે. જ્યારે તાપીના સોનગઢમાં પણ વાતાવરણમાં પલટો જોવા મળ્યો હતો. ધગધગતી ગરમી અને તાપ વચ્ચે અચાનક વાદળછાયું વાતાવરણ સર્જાયું અને વરસાદી ઝાપટા પણ પડ્યા છે.

જ્યારે કચ્છના ગાંધીધામ, ભુજ સહિતના વિસ્તારોમાં વાદળછાયું વાતાવરણ સર્જાયું છે.  ગાંધીધામ અને કંડલાના આસપાસના વિસ્તારોમાં ભારે પવન ફૂંકાયો છે. આ વિસ્તારમાં ઠંડા પવન અને ઝાપટાના કારણે લોકોને ગરમીમાં આંશિક રાહત પણ મળી હતી. જ્યારે કેટલાક વિસ્તારમાં વીજળીના થાંભલા અને વૃક્ષો પણ ધરાશાયી થયા હતા.